Addibila ni arogola:

Odhivela ninnihuna ni Mulugu vamodha naathu winonthukulela ‘odhowa wahudhiha athu amalogo amatene, wihina ekale anamahara, naabaddizaga.’ (Mat. 28:19, 20; Mar. 12:28-31) Odhivela webaribari wihikanna kopolo. Odhivela podi odahinya murima dhaathu ‘enna efunelo yapama yegumi yohimala.’ — Dhowera Dhaarumiwi 13:48.

Kale niilibihedha odekoraari muselu nnathapanyihu naathu ni wavaha malivuru. Mbwenye vano nnohowela owomihedha makalelo ehu othapanya naaliwa. Nnafuna nawonihe odhivela athu wodhela owoga dhithu dhinaapatha. Eyo enatapulela wihina nnohowela wisaddula mowaguva ni wilibihedha woona dhothuwathuwiha ni dhithu anafuna kadda muthu. Ki buruxura nna nnaanikavihere aavi?

Buruxura nna ninna dhohudhera 12 dhinoniha dhikalelo nnahowelihu okanna wihina noonihe odhivela ni nahudhihe athu wi ekale anamahara. Kadda ohudhera onowoga epaddi ya mBibiliyani enawoga ekalelo onihile Yesu obe onihile mukiristawu a nsaka noobajha mmalaleyelo. Efunelo yehu kahiyo odekoraari muselu nnathapanyihu naathu, mbwenye osayela makalelo owawoniha athu odhivela. Ebaribari wihina dhikalelo ndha 12 dhinofuneya naaparaga mabasa amatene olaleya, mbwenye nnere woona makalelo dhikalelo ndha dhiliwa dhofuneya nabajhagawene othapanya ni muthu, nadhowaga omwaredhela ni naamuhudhihaga Bibiliya.

Waasuzaga kadda ohudhera, opendde makalelo ononihiwe ekalelo eyo wawogaga naathu amurudda wawo. Wenjhedhedhe odhivela onniwena ni Yehova vamodha naathu. Odhivela bunuukavihere wakwanihedha mutoma onahoweleya, wowahudhiha athu wi ekale anamahara.

Gari enlubale olaba vamodha ni nyu. (Sof. 3:9) Nnolobela wihina Yehova adideleve oreeliha wilibihedha weenyu, wowadhivela athu ni wahudhiha wi ekale anamahara.