D saam-biis la d saam-bi-pogse:

D sẽn nong Wẽnnaam la neb a taabã yĩnga, d rat n ‘sõnga buud toɛy-toɛyã fãa neb tɩ b lebg a Zeezi karen-biisi, la d lis-ba.’ (Mat. 28:19, 20; Mark 12:​28-31) Nonglem sẽn pa baood a meng nafr tara pãng wʋsgo. Nonglem a woto na n kɩtame tɩ d tõog n sõng neb nins “sẽn tar yam ning sẽn zems ne vɩɩm sẽn ka sɛtã.”—Tʋʋ. 13:48.

Pĩndã, koɛɛgã mooneg sasa, d ra nong n togsda nebã goam d sẽn zãms ne zugu, la d kõt-b sɛba. Masã d segd modgame n bãngd n sõsd ne nebã. D rat n gomda ne nebã bũmb sẽn pak-b yelle, n wilg tɩ d nong-b lame. Woto rat n yeelame tɩ d sakd n toeemdẽ, la d gũusd n get bũmb nins sẽn pak ned kam fãa wã, pa rẽ bɩ b sẽn nong n gomd bũmb ning yellã. Wãn to la seb-kãngã na n sõng-d tɩ d tõog n maan rẽ?

Sebrã tara sags 12, sẽn wilgd zʋg-sõma d sẽn segd n bɩɩse, sẽn na yɩl n wilg tɩ d nonga nebã, la d sõng-b tɩ b lebg a Zeezi karen-biisi. Sak fãa tika Biiblã kibar zugu. Tõe n yaa kibar sẽn gomd a Zeezi yelle, wall koe-moond sẽn zĩnd pipi kiris-nebã wakatẽ yelle, la zʋg-sõng ning a sẽn tall koɛɛgã mooneg wɛɛngẽ. B pa yiis seb-kãngã n dat tɩ d rɩk goam nins fãa sẽn be a pʋgẽ wã ne zug ye. Yaa sẽn na yɩl tɩ d tõog n tũnug ne manesem buud toor-toor n wilg nebã tɩ d nong-b lame. Yaa sɩd tɩ koe-moonegã nens fãa pʋgẽ, yaa tɩlɛ tɩ d bɩɩs zʋg-sõma. La d na n goma zʋg-sõma kẽer sẽn yaa tɩlɛ yelle, d sẽn tõe n sɩng sõsg to-to ne nebã wɛɛngẽ, lebg n tɩ kaag nebã wɛɛngẽ, la zãms nebã Biiblã wɛɛngẽ.

Y sã n wa zãmsd sak fãa, bɩ y maag y yĩng n tags n ges y sẽn tõe n tũ bũmb ning y sẽn bãngdã to-to, y sã n wa sõsd ne nebã zĩig ning yãmb sẽn be wã. Modg-y ne y sũur fãa tɩ yãmb sẽn nong a Zeova la y taabã to-to wã pãng paasdẽ. Sẽn yɩɩd fãa, yaa nonglem-kãng n na n sõng yãmb tɩ y tõog n sõng nebã tɩ b lebg a Zeezi karen-biisi.

D sẽn paam n naag yãmb bãok ne bãok n tʋmdẽ wã yaa zu-zẽkr meng-meng n kõ-do. (Sof. 3:9) Bɩ y kell n wilg tɩ y nonga nebã, n sõng-b tɩ b lebg a Zeezi karen-biisi. Bɩ a Zeova kell n ning-y bark wʋsgo!