Ku Wanawitu na Wankazi Awakundikwe:

Ukukunda Leza na wantu akuno kukalenga ‘atuya mukusambilizya imyiko yonsi pa kuti wawe awasambi nu kuwabatizya.’ (Mat. 28:19, 20; Mar. 12:28-31) Ulukundo lwa musango wo-o aluno lukalenga atwavwa awantu wano ‘wakalonda uwumi wamuyayaya.’​—Imili. 13:48.

Ko-o ku nsizi, twawikanga nkaninye amano ku vyewo vino watunenanga ukuwomvya pa kulanzyanya na wantu nga nu kuwasila amabuku. Lelo pe yo-o impindi, tukulonda ukuwika amano pe vino tungacita pa kuti twalanzyanya icete na wantu. Tukulonda ukulanjizya ukuti twakunda wanji ukupitila mu kulanda pe vino wangatemwa ukwivwa. Co-o cikusula mu kuti, tuzipizile twayikundila ukupiluka nga nu kulanzyanya nawo amalyasi yano yawakumile nanti yano wangatemwa ukwivwa. Vino vili mwe yo-o broshuwa vyandi vitwavwe ukumanya vino tungacita wo-o.

Yo-o broshuwa yikweti amasambililo 12. Cila lisambililo likulanda pa miwele yino tuzipizile ukuwa nayo pa kulanjizya ulukundo kwe wanji nu kupanga awasambi. Swinya cila lisambililo lilanzile pi lyasi lya mu Baibolo lino likulanda pa miwele yino e Yesu nanti awina Klistu wakutalicilako wamwi walanjizizye pano wawizyanga. Yo-o broshuwa yiwezile ku kutwavwa ukulola inzila zino tungalanjizizyamo ukuti twakunda awantu, asa yakutwavwavye ukwizuka ivyakulanzyanya nawo. Imiwele imizima yino tukalanjizya pano tukuwizya, yacindama nkaninye. Lelo mwe yo-o e broshuwa walanzile pa miwele yino yikalondekwa sana maka maka pano tukutalika ukulanzyanya na wantu, twanyocela ku cipempu nanti pano tukutungulula amasambililo ye Baibolo.

Pano mukusambilila isambililo lyonga na lyonga, mwakwelenganya pe vino mungalanjizya yoyo imiwele pano mukulanzyanya na wantu kuno mwikalila. Acino twalililani ukukunda e Yehova na wantu. Amuno lonye ulukundo aluno lulimyavwa ukupanga awasambi.

Tukakwivwa icimwemwe nkaninye ukuwombela ponga na mwemwe. (Zefa. 3:9) Acino tukupepa ukuti e Yehova atwalilile ukumipaala pano mukutwalilila ukukunda awantu na pano mukupanga awasambi!