Toikniuaj katli tiinmechikneliaj:

Tojuantij tlauel tikinikneliaj toTeotsij uan maseualmej, yeka tijneltokaj ni tlanauatili: “Xiakaj uan xikinmachtikaj maseualmej tlen nochi altepemej ma elikaj notokilijkauaj. Xikinatsonpoliuiltikaj” (Mat. 28:19, 20; Mar. 12:28-31). Kema tijnextiaj nelnelia titeikneliaj, tiuelij tiasij ipan ininyolo maseualmej katli kinekij kipiasej nemilistli tlen axkema tlamis (Hech. 13:48).

Uejkajkia, tijchiuayayaj kampeka san tijtsontekontlalisej tlen tikiniljuisej maseualmej uan tikinmakasej amatlajkuiloli. Uan nama, moneki kuali timoiljuisej kema timonojnotsasej iuaya se akajya. Tijnextiaj tikinikneliaj kema tikamanaltij tlen inijuantij kinpaktia o tlen kinekij kimatisej. Amo tisansemej, yeka moneki kuali tikitasej tlake kineki kimatis uan tlake kitekipachoua katli iuaya timonojnotsaj. ¡Ni pilamochtsi mitspaleuis kiampa tijchiuas!

Ni pilamochtsi kipia 12 tlamachtili tlen kipankixtia 12 kuajkuali tlamantli tlen techpaleuis tijnextisej titeikneliaj uan kiampa tikinpaleuisej maseualmej ma mochiuakaj Jesús itokilijkauaj. Sejse tlamachtili mokixtijtok ipan se keski textos tlen Biblia kampa nesi kenijkatsa Jesús, o seyok tlajtolmoyajketl tlen achtoui siglo, kinextik se kuali tlamantli kema tlajtolmoyajki. Nama ayokmo tijnekij san tijtsontekontlalisej tlen tikijtosej, tijnekij maseualmej ma kiitakaj nelnelia tikinikneliaj. Maske nochi nopa kuajkuali tlamantli tlen kiixtoma ni pilamochtsi techpaleuia kema titlajtolmoyauaj, se keski nelia tlauel moneki tijnextisej kema achtoui tijnojnotsaj se akajya, kema sampa titepaxalouaj uan kema titlamachtiaj.

Kema timomachtis sejse tlamachtili, ximoiljui kenijkatsa tijnextis nopa kuajkuali tlamantli kema tikinnojnotsas maseualmej kampa ta titlajtolmoyaua. Nopa tlaiknelili tlen tikinpialiaj Jehová uan maseualmej tlauel ipati uan amo kej timomajtokej titlajtolmoyauaj. Yeka, xijchiua kampeka nojua tikiskaltis nopa tlaiknelili. Tlaj kiampa tijchiuas, uajka tiuelis tikinpaleuis maseualmej ma elikaj Jesús itokilijkauaj.

Tlauel tijpatiitaj titekitisej inmouaya, nelia eli se ueyi tlateochiualistli (Sof. 3:9). ¡Tijtlajtlaniaj Jehová ma inmechteochiua pampa inkichiuaj kampeka inkinpaleuisej sekinok ika miak tlaiknelili ma elikaj Jesús itokilijkauaj!