Tokniuantsitsin:

Kemej tiktasojtaj Dios uan no oksekin nejon kichiua maj tiktakamatikan nejin tanauatil: “Xiakan uan xikinmachtikan akin nemij itech nochi taltikpak para maj nechtojtokakan. Xikinauikan” (Mat. 28:​19, 20; Mar. 12:​28-31). Komo yekmelauj tikintasojtaj oksekin, uelis tikinpaleuiskej akin kipiaj “tanemilil tein moneki para nemiskej nochipaya” (Hech. 13:48).

Achto keman tiayaj titanojnotsatij timochikauayaj tikiniluiskej oksekin tein tikmatiajya uan tikinmakaskej amaixmej. Sayoj ke axkan moneki okachi kuali tiknemiliskej keniuj tikinnojnotsaskej oksekin. Tikinnextiliaj ke tikintasojtaj keman tikinnojnotsaj ika se taman tein yejuan kinekij kimatiskej. Tinochin titatamamej, yejua ika keman tiknojnotsaskej aksa moneki ika titajtoskej tein yejua kineki kimatis uan tein kitekipachoua. ¡Nejin amaix techpaleuis maj ijkon tikchiuakan!

Nejin amaix kipia 12 tamachtilismej tein ika tajtouaj seki taman tein kuali tein moneki tiknextiskej tein techpaleuis para maj tikintasojtakan oksekin uan maj kuali tikinmachtikan. Sejse tamachtilis ika tajtoua tein kichiuak Jesús oso okse itekitikauj Dios akin kinextijkej seki taman tein kuali keman kinnojnotsayaj oksekin. Keman tiknojnotsaskej aksa amo sayoj tiknekij tikiluiskej tein tikmatijya, ta tiknekij tikinnextiliskej ke tikintasojtaj. Maski nochi tamachtilismej tein ika tajtoua nejin amaix techpaleuiskej keman titanojnotsaskej, tikonitas ke sekin semi mitsonpaleuiskej keman tionpeuas tikinnojnotsas oksekin, keman oksepa tikinkalpanos uan keman tiontamachtis ika Biblia.

Keman tionmomachtis sejse tamachtilis, kuali xikonnemili keniuj tikonchiuas tein tionmomachtij keman tikinnojnotsas oksekin. Moneki kuali titamachtiskej, sayoj ke tein okachi tayekantok yejua tiktasojtaskej Jehová uan oksekin. Yejua ika okachi xionmochikaua tikintasojtas. Ijkon uelis tikinpaleuis oksekin maj kitojtokakan Cristo.

Semi kualtsin titekitiskej namouan (Sof. 3:9). ¡Maj Jehová kisentoka namechtatiochiui porin namochikauaj nankintasojtaskej oksekin keman nankinpaleuiaj maj kitojtokakan Cristo!