Kini Bafowethu Labodadewethu

Ukuthanda uNkulunkulu labantu yikho okusenza ‘sihambe siyekwenza abantu bezizwe zonke babe ngabafundi, sibabhabhathize.’ (Mat. 28:19, 20; Mak. 12:28-31) Ukuthanda abantu ngenhliziyo yonke kuzasinceda ukuthi sidinge labo ‘abalenhliziyo eziqotho futhi abazimisele ukuthola ukuphila okungapheliyo.’—Imiseb. 13:48.

Besijayele ukusebenzisa kakhulu intshumayelo esiyabe sizibambe ngekhanda futhi sinika abantu amabhuku. Kodwa khathesi sesifuna ukuthuthukisa indlela esixoxa ngayo labantu. Sifuna ukutshengisa ukuthi siyabathanda ngokukhuluma ngalokho okuzakwenza babone ukuthi silendaba labo. Lokhu kutsho ukuthi kumele sitshintshatshintshe ingxoxo zethu kusiya ngomuntu esikhuluma laye. Phela okukhathaza abantu lalokho abakuthandayo kuyatshiyana. Kanti njalo lezimo zabo azifanani. Manje ibhukwana leli lizasinceda njani ukuthi sikwenze lokhu?

Ibhukwana leli lilezifundo ezingu-12 ezikhuluma ngalokho okumele sikuthuthukise ukuze sitshengise ukuthi siyabathanda abantu njalo senelise ukwenza abafundi. Esifundweni ngasinye sizahlola okwenziwa nguJesu enkonzweni kumbe ngomunye umKhristu owaphila ngesikhathi sabaphostoli. Asisafuni kubamba intshumayelo ngekhanda kodwa sesifuna ukudinga izindlela zokutshengisa abantu ukuthi siyabathanda. Lanxa umcijo ngamunye esizaxoxa ngawo uqakathekile kuzo zonke ingxenye zenkonzo yethu, sizafuna ukubona ukuthi usinceda njani ikakhulu nxa siqalisa ingxoxo, siphindela kumbe sesifunda lomuntu iBhayibhili.

Esifundweni ngasinye, cabangisisa ngokuthi ungakusebenzisa njani lapho ohlala khona. Zimisele ukumthanda kakhulu uJehova futhi ubathande labantu. Ukwenza njalo kuzakunceda ukuthi wenze abantu babe ngabafundi.

Siyasiqakathekisa kakhulu isibusiso sokusebenza simanyene lawe. (Zef. 3:9) Sengathi uJehova angakubusisa okwamagama njengoba uqhubeka ubathanda abantu futhi ubancedisa ukuthi babe ngabafundi!