Hama no Hambzaji Jinodiwa:

Kuda kwatinoita Mwari no vandhu kunotiita kuti ‘tiende, kojijisa vandhu vo majinja ese kuti vave vateveri va [Jesu no] kuvabhabhatija.’ (Mat. 28:​19, 20; Mar. 12:​28-31) Kuva no rudo wo kujiramba kunosisira maningi. Ikona kungapsasa mwoyo jo vaya vano “cido co kuwana upenyu hucikaperi.”—Mab. 13:48.

Kare, taibatikana maningi pa kueja kudira mu musoro manera atingabhuya no vandhu perapo tosiya mabhuku. Wari tinoda kushanda ngo simba kuti tiitise nane manera edu o kubhuya no vandhu. Tinoda kukhombija rudo kuno vamweni ngo kubhuya shwiro yavanodakarira. Izvi zvinoreva kuti tinodikana kuva vandhu vacikanesi kucinja no vanonasa kusotesesa kuti tivone zviri kunesa vamweni no zvavanodakarira. Waro bhurushura iri rinozotibesera kudini pa kuita izvi?

Bhurushura iri rino zvijijo zvinokwana kuita 12 zvinovonesa mugariro jinodikana kusakurihwa nga umwe na umwe wedu kuti tive vandhu vanokhombija rudo no vanokwanisa kubesera vamweni kuti vave vajiji va Jesu. Cijijo cimwe nga cimwe cinozobhuya ngo ciitiko co mu Bhaibheri cinovonesa mugariro wakakhombijwa ndi Jesu kubatanijavo no Makristu amweni o muzana rokutanga paainga ecicumaera. Cinangwa cakona asipi co kudira matangiro atinoda kuita mu musoro mwedu, asi ngo co kupsaka manera okukhombija rudo kuno vandhu. Mugariro jese jinozonangwari jinosisira kuti tiite basa redu ro kucumaera. Tinozovona kuti ngenyi mugariro jimweni jinodiwa maningi patinonga tecitanga mabhuyo, kuita hwiririro no kuita jijo jo Bhaibheri.

Pamunonga mecijija cijijo cimwe nga cimwe, nasanyi kuvona manera amungakhombija mugarirowo pamunonga mecibhuya no vandhu ku ndau yamunogararo. Ejanyi kuvangisa rudo hwenyu kuna Jehovha no kuno vandhu. Rudo wondhowo, unozomubesera maningi kuti mukwanise kubesera vandhu kuti vave vajiji va Jesu.

Itusu tinodakara maningi ngo kuva no makomborero aya o kushanda pamwepo nemwi no takabatana. (Sof. 3:9) Jehovha ngaamukomborere ngo kwenderera kwenyu mberi mecida vandhu no kuvabesera kuti vave vajiji va Jesu.