Komwiitaali omukwetu,

Ohole yetu yokuhola Kalunga nosho wo aantu ooyakwetu, ohayi tu inyengitha tu ninge ngaashi Ombiimbeli tayi tu lombwele tayi ti kutya “indeni . . . , ka ningeni aantu yomiigwana ayihe aalongwa, moku ya ninginitha.” (Mat. 28:19, 20; Mark. 12:28-31) Okukala kaatu ihole tse yene oshinima sha simana lela. Ohashi vulu okuguma omitima dhaamboka ya halelela shili oku ka mona “omwenyo gwaaluhe.” — Iil. 13:48.

Okuza nale, otwa kala unene hatu uvitha tatu longitha iiholelwa yomafalomo nosho wo okuthigila aantu iileshomwa. Ihe ngashingeyi otwa pumbwa okuhwepopaleka omukalo gwetu gwokukundathana nayalwe. Otwa hala okukala hatu ulukile aantu ohole mokupopya kombinga yiinima mbyoka ye na ohokwe muyo. Shono osha hala okutya otu na okukala hatu lundulula iikundathanwa yetu nosho wo okukonenena kutya omuntu ota ipula nashike noku hole shike. Okambo hano otake ke ku kwathela ngiini wu shi ninge?

Oke na iileshwa yi li 12 mbyoka tayi tu longo omaukwatya ngoka tu na okukokeka, opo tu kale tu hole aantu noku ya ninga aalongwa. Oshileshwa kehe osha kankamena kehokololo li li mOmbiimbeli kombinga yankene Jesus, nenge aauvithi yalwe mboka ya li ko omimvo 2000 nasha dha ka pita, ya li ya ulike uukwatya wontumba sho taya uvithile aantu. Elalakano olyo kutya inatu pumbwa tu kale hatu kopele momutse iiholelwa yomafalomo, ihe pehala lyaashono, otwa hala okuulika omaukwatya ngoka taga holola kutya otu hole aantu. Nonando omaukwatya ngoka oga pumbiwa noonkondo sho tatu kutha ombinga miilonga yokuuvitha yoludhi kehe, otatu ka tala nkene omaukwatya gamwe ga pumbiwa unene tuu ngele tatu tameke oonkundathana naantu, tatu ningi omaishunoko nenge tatu konakona Ombiimbeli nayalwe.

Sho to lesha oshileshwa kehe, dhiladhila muule kutya ongiini to ka vula okulongitha uukwatya mboka sho to uvithile aantu moshitopolwa sheni. Ninga oonkambadhala wa mana mo, wu kale wu hole Jehova nosho wo aantu. Ohole ndjono, oyo unene tayi ke ku kwathela wu adhe omalalakano goye gokuninga aantu aalongwa, ihe hamikalo dhokondandalunde ndhoka hatu longitha.

Oshi li uuthembahenda unene kutse okulonga pamwe nane amuhe tu li epepe nepepe. (Sef. 3:9) Jehova ne ku laleke nuuyamba sho to tsikile okukala wu hole aantu noku ya ninga aalongwa.