Bana Babo Rena le Dikgaetšedi ba ba Rategago:

Go rata Modimo le batho go re dira gore re ‘ye re dire batho ba ditšhaba ka moka barutiwa, le go ba kolobetša.’ (Mat. 28:19, 20; Mar. 12:28-31) Go rata batho go tšwa pelong go na le mehola e mentši. Go ka kgoma dipelo tša bao ba nago le “tshekamelo e swanetšego ka bophelo bjo bo sa felego.”—Dit. 13:48.

Nakong e fetilego re be re tshwenyega ka go swara dilo tšeo re tlago go boledišana le batho ka tšona ka hlogo le go ba tlogelela dikgatišo. Gona bjale re nyaka go kaonefatša tsela yeo re boledišanago le batho ka yona. Re nyaka go bontšha batho gore re a ba rata ka go boledišana le bona ka dilo tšeo di ba kgahlago. Seo se ra gore re swanetše go fetofetoga le maemo le go šetša dilo tšeo motho yo mongwe le yo mongwe a tshwenyegilego ka tšona, le tšeo di mo thabišago. Poroutšha ye e tlo re thuša go bona gore re ka dira seo bjang.

Poroutšha ye e na le dithuto tše 12 tšeo di re botšago ka dika tšeo re swanetšego go ba le tšona. Dika tšeo di tlo re thuša gore re kgone go bontšha batho ba bangwe gore re a ba rata ke moka re ba dire barutiwa. Thuto e nngwe le e nngwe e tšwa ka Beibeleng moo Jesu goba yo mongwe wa baebangedi ba lekgolong la pele la mengwaga a hlaloswago a bontšha seka se itšego ge a le tšhemong. Morero wa dithuto tše ga se gore re sware dilo tšeo re tlago go boledišana le batho ka tšona ka hlogo, eupša ke go nyaka ditsela tša go bontšha batho gore re a ba rata. Le ge seka se sengwe le se sengwe se le bohlokwa ge re botša batho ditaba tše dibotse ka ditsela tša go se swane, re tlo boledišana ka dika tšeo di nyakegago kudu ge re thoma poledišano, re dira maeto a go boela goba ge re swere dithuto tša Beibele.

Ge o dutše o ithuta thuto e nngwe le e nngwe, ipotšiše gore o ka bontšha bjang batho ba moo o dulago gona seka seo go bolelwago ka sona thutong yeo. Šoma ka thata gore o bontšhe Jehofa le batho ba bangwe gore o a ba rata. Go dira bjalo go tla go thuša gore o kgone go dira batho barutiwa go feta go diriša mokgwa le ge e le ofe.

Re leboga tokelo e kgolo ya go šoma gotee le lena. (Tsef. 3:9) Eka Jehofa a ka le šegofatša kudu ge le dutše le bontšha batho gore le a ba rata e bile le ba dira barutiwa!