Ab’eishe-emwe na Banyaanyazi-itwe Abakundwa:

Rukundo ei twiniire Ruhanga n’abantu neetuhiga ‘kugyenda omu mahanga goona, kuhindura abantu abeegi n’okubabatiza.’ (Mat. 28:19, 20; Mak. 12:28-31) Rukundo etari y’okweyendeza n’ey’amaani. Neebaasa kukwata aha mitima y’abaine ekihika ky’okukorerera amagara agatahwaho.—Byak. 13:48.

Enyima, tukaba nituta omutima aha kukwata enyanjura omu mutwe n’okutsigira abantu ebitabo. Hati twine kuboneza omu migaaniirire yaitu n’abantu. Nitwenda kworeka ngu nitukunda abandi turikugamba nabo aha bintu ebirikubashemeza. Eki nikimanyisa ngu twine kuba tweteekateekire kuhinduramu n’okufayo aha biteekateeko by’omuntu n’ebirikumushemeza. Akatabo aka nikaija kutuhwera kukora tuta eki?

Karimu amashomo 12 agarikugamba aha mitwarize ei twine kugira kutubaasisa kukunda abantu n’okubahindura abeegi. Buri eishomo nirigamba aha mutwarize ogu Yesu, nari omwe aha babuurizi omu kyasha ky’okubanza baayorekire omu buheereza. Ekigyendererwa ti kukwata enyanjura omu mutwe, beitu n’okusherura oburyo bw’okworeka ngu nitukunda abantu. N’obu buri mutwarize guraabe nigwetengyesa omu miringo yoona ey’obuheereza bwaitu, okukira munonga nituza kureeba oku emitwarize emwe erikwetengyesa omu kutandika ebigaaniiro, omu kugarukayo, nari omu kwegyesa abeegi ba Baibuli.

Waaba nooshwijuma buri ishomo, teekateeka n’obwegyendesereza oku orikubaasa kworeka omutwarize ogwo waaba noogamba n’abantu omu kicweka kyanyu. Teeraho kwongyera kukunda Yehova n’abantu. Rukundo egyo, okukira akakoryo akandi koona, neija kukuhwera kuhika aha kigyendererwa kyawe eky’okuhindura abantu abeegi.

Nitusiima omugisha gw’amaani ogw’okukora naimwe. (Zef. 3:9) Yehova abahe omugisha murikugumizamu nimukunda abantu, kandi murikubahindura abeegi!