Abale Wathu Wakufunidwamwe:

Lufoyi lathu kwa Mulungu na wanthu limbaticitisa kuti ‘tiyende . . . tikapfunzise wanthu wa mitundu yentse kuti akhale anyakupfunza wa Jezu, ticiwabatiza.’ (Mat. 28:19, 20; Mar. 12:28-31) Lufoyi cairo ndamphanvu kwene-kwene. Iro lingatokonye mitima ya wale omwe ‘ana makumbukidwe yabwino yomwe yangawathandize kudzagumana moyo wakusaya kumala.’ — Mab. 13:48.

M’mbuyomu, ifepano tikhambafuna kuyambisa maceza mu upalizi na mafala yomwe tikhayakoya mu msolo na kugawirambo mabukhu. Koma tsapano, tin’funika kucita nyongo yakukulisa luso lathu la kuyambisa maceza na wanthu. Ndipo tin’funikambo kuwalatiza lufoyi mwa kumbayambisa maceza yomwe yangawadekere. Bzimwebzi bzikuthandauza kucinja-cinja upalizi bwathu na kukhalambo tceru pa bzinthu bzomwe bzikuwacitisa thupo. Kodi broxurali lin’dzatithandiza tani kucita bzimwebzi?

Broxurali lina misolo yakukwana 12 yomwe ikufotokoza makhalidwe yomwe tin’funika kukhala nayo kuti timbalatize lufoyi kuna wanthu na kuwapfunzisa cadidi. Msolo uli-wentse ukufotokoza nkhani ya m’Bibliya yakulewa bza khalidwe libodzi lomwe Jezu adalilatiza pakupalizira ayai lomwe lidalatizidwa na mtumiki wa Mulungu wa mu nthawe ya Akristau wakuyambirira. Cakulinga cathu cin’funika lini kukhala cakumbakoya mu msolo mafala yakuyambisira maceza mu upalizi, koma kumbanyang’ana njira za momwe tingalatizire lufoyi kuna wanthu. Napo kuti khalidwe liri-lentse lomwe tin’pfunza mu broxura lino ndakufunika pa mbali zentse za utumiki bwathu, tsono tiniwona momwe makhalidwe yanango yaliri yakufunika kwene-kwene pomwe tikuyambisa maceza mu utumiki, pomwe tikucita maulendo yakubwereza, na pomwe tikucitisa mapfunziro ya Bibliya.

Tenepo, pomwe imwepo mukupfunza msolo uli-wentse, kumbukirani bwino-bwino momwe mungalatizire makhalidweyo pomwe mukuceza na wanthu komwe mumbakhalako. Citani nyongo yakukulisa lufoyi lanu kwa Yahova na wanthu. Kucita bzimwebzi kun’dzakuthandizani kukwanirisa cakulinga canu ca kupfunzisa wanthu kuti akhale ateweri wa Jezu.

Tikutenda kwene-kwene mwayi ukulu wakuphata basa pabodzi na imwepo. (Zef. 3:9) Ndipo Yahova akusimbeni kwene-kwene pomwe mukupitiriza kufuna wanthu na kuwathandiza kukhala anyakupfunza!