Нӕ хъазар хуӕртӕ ӕма ӕнсувӕртӕ!

Хуцауи ӕма адӕни ке уарзӕн, уомӕ гӕсгӕ нӕ фӕндуй архайун аци фӕдзӕхстмӕ гӕсгӕ: «Цотӕ ӕма... ӕгас адӕнихӕттитӕй дӕр цӕттӕ кӕнтӕ ахуркӕнуйнӕгтӕ. Дӕттетӕ син донаргъуд» (Матф. 28:19, 20; Мар. 12:28–31). Уодуӕлдай уарзтӕн устур хъаурӕ ес. Уой фӕрци нӕ бон ӕй, «ӕносон царди надбӕл цӕун ке фӕндуй», уони зӕрдитӕмӕ над ерун (Гъуд. 13:48).

Раздӕр нӕ нисан фиццагидӕр адтӕй, дзубанди райдайӕн куд ес, уой нигъгъуди кӕнун ӕма литературӕ ниууадзун. Нур ба не ’ргом фулдӕр фездахӕн, цӕмӕй адӕни хӕццӕ дзорунмӕ хуӕздӕр арӕхсӕн. Мах фӕндуй адӕни хӕццӕ дзорун, уони ци тухсун кӕнуй, уобӕл. Уой туххӕй ба гъӕуама цӕттӕ уӕн уавӕртӕмӕ гӕсгӕ архайун ӕма, ку багъӕуа, уӕд дзубанди раййевун. Уотемӕй ӕй ӕвдесдзиан, ке сӕ уарзӕн, уой. Уомӕн нин аци брошюрӕ куд банхус кӕндзӕй?

Аци брошюри ес 12 урокки. Дзурд си цӕуй, адӕни уарзунмӕ ӕма ахуркӕнуйнӕгтӕ цӕттӕ кӕнунмӕ нин ка банхус кӕндзӕй, уӕхӕн 12 менеуӕгей туххӕй. Алли урок дӕр арӕзт ӕй Библийӕй цӕхуӕндӕр хабарбӕл, ӕма си ӕвдист ӕй, Йесо кенӕ фиццаг ӕноси киристӕнттӕй кадӕр цӕхуӕндӕр бӕлвурд менеуӕг куд ӕвдиста, е. Ӕ нисан е нӕй, цӕмӕй, дзубанди райдайӕн куд ес, уой исахур кӕнӕн, фал цӕмӕй адӕни ке уарзӕн, уой бавдесунмӕ фадуӕттӕ агорӕн. Мах ӕркӕсдзиан, еци менеугутӕ ӕхсидзгӕ цӕмӕн ӕнцӕ адӕймаги хӕццӕ дзубанди кӕнун ку райдайӕн, нӕуӕгӕй имӕ ку ’рбацӕуӕн ӕма Библий ахур ку фӕууадзӕн, уӕд.

Алли урок ӕртасгӕй дӕр лӕмбунӕг расагъӕс кӕнисӕ, дӕ бон куд адтайдӕ аци менеуӕг игъосун кӕнгӕй ӕвдесун. Архайӕ, цӕмӕй Йегови ӕма адӕни никки хъӕбӕрдӕр уарзай. Уарзондзийнадӕ дин куд банхус кӕндзӕй ахуркӕнуйнӕгтӕ цӕттӕ кӕнгӕй, уотӕ дин игъосун кӕнуни мадзӕлттӕй еу дӕр нӕ банхус кӕндзӕй.

Мах устур кадӕбӕл нимайӕн, дӕ хӕццӕ усхъӕй-усхъӕмӕ ке лӕггадӕ кӕнӕн, уой (Соф. 3:9). Адӕни ке уарзис ӕма ахуркӕнуйнӕгтӕ ке цӕттӕ кӕнис, уой туххӕй дин Йеговӕ рӕдауӕй арфӕ кӕнӕд!