Munasqa hermanos:

Diosta, runastapis munakusqanchejrayku kay kamachiyta kasukunchej: “Riychej, tukuy nacionesmanta runasta discipulosniyman tukuchimuychej. Paykunata bautizamuychej” (Mat. 28:19, 20; Mar. 12:28-31). Runasta tukuy sonqo munakusun chayqa, “wiñay kausayta japʼinankupaj allin sonqoyoj” kajkunata yanapayta atisun (Hech. 13:48).

Ñaupajtaqa imaynatachus runaswan parlayta qallarinata de memoria yachakunapaj, publicacionestapis runasman jaywanapaj kallpachakoj kanchej. Kunantaj kallpachakunchej runaswan sumajta parlariyta yachakunapaj. Paykunata munakusqanchejrayku, imasmantachus yachakuyta munanku chay imasmanta parlarinchej. Runas mana kikinchu kasqanchejrayku ama nisqallanchejta valechinachu, astawanpis imasmantachus yachakuyta munanku, imaschus paykunata llakichin chay imasmanta parlarina. Kay folletotaj chayta ruwanapaj yanapawasun.

Kay folletoqa 12 leccionesniyoj, sapa leccionpitaj uj imata yachakusunchej runasta munakunapaj, yachachinapaj ima. Sapa leccionpi parlakushan Jesús chayri ñaupa tiempomanta uj cristiano imaynatachus chayta ruwasqanmanta. Imatachus runasman ninata de memoria yachakunamantaqa, runasta munakusqanchejta imaymanamanta rikuchiyta munanchej. Kay folleto imasmantachus parlan chay imastaqa, willaypi ruwananchejpuni tiyan. Jinapis chaykunamanta wakintaqa astawanraj ruwananchej tiyan runaswan parlayta qallarishaspa, revisitasta ruwashaspa, Bibliata estudiachishaspa ima.

Sapa leccionta estudiashaspaqa piensarina imaynatachus chayman jina ruwanapi maypichus tiyakunchej chaypi willashaspa. Jehovata, runa masistapis munakusqanchejqa imamanta nisqapis aswan sumaj. Chayrayku mayta kallpachakuna Jehovata, runastapis astawan munakunapaj. Chaytaj yanapawasun runasta Jesuspa discipulosninman tukuchimunapaj.

Khuska Jehovapaj llankʼasqanchejqa may sumajpuni (Sof. 3:9). Jehová bendecichun runasta munakusqaykichejrayku paykunaman yachachimusqaykichejta.