Llaquishca huauqui paniuna:

Yaya Diosta runaunaras llaquishcamanda “richi, runaunara yachachichi [...], paigunara bautisaichi” nisha ñucanchira animachin (Mat. 28:​19, 20; Mar. 12:​28-31). Shungumanda llaquina ashca ushai charinmi. “Tucui huiñai causaira charina ajcuna” shunguma cai pactana ushan (Hech. 13:48).

Ñaupa timpui, Bibliamanda yachachinai ima rimanara de memoria yachangaj quillcaunara saquingajpas ursarij acanchi. Cuna ursarina ministinchi runaunahua shungumanda cuintanunungaj. Shujcunara llaquinara ricuchinchi paiguna munashca, ministishca temagunamanda cuintanusha. ¿Imasnara cai quillca caita pactachingaj yanapanga?

Cai quillca 12 leccionguna ñucanchi ministishca ali ruranara yachachin llaquinara ricuchingahua, runauna Jesusta catij tucuchu yanapangahuas. Caran lección Biblia cuintashcamanda apishca an, chibi Jesús o pai timpui shuj catijcuna ali ruranara ricuchinuca Diospa Shimira yachachinai. De memoria yachashcara rimana randi runaunara llaquinara ricuchingaj ursarina munanchi. Caran ali ruranara ministishca ajpis Bibliamanda yachachingaj alira ricushun huaquin ruranauna mas ministishca ashcara cuintanunara callaringaj, cuti pasiangaj, runaunara Bibliamanda yachachingajpas.

Caran leccionda yachachiushcai alira riparai imasna ali ruranaunara ricuchina ushashcara camba llactai runaunahua rimangaj. Jehová Diosta runaunaras mas llaquingaj ursari. Shujta rurana randi llaquina ashcara canda yanapanga Jesusta catij tucunuchu yanapanara pactachingaj.

Canguna pariju tarbanara ashcara valichinchi (Sof. 3:9). ¡Jehová cangunara ashcara bendiciachu runaunara llaquisha catijpi Jesusta catijcuna tucungaj yanapajpi!