Amare dragane phrala the pheňa:

Amaro kamiben ko Del the ko manuša amen cirdel „te kerel le učeňiken le manušendar andal savore narodi“ a te bolel len. (Mat. 28:19, 20; Mar. 12:28–31) Te presikavas o kamiben, šaj oda chudel le jilestar olen, so kamen te dživel pro furt. (Sk. 13:48)

Varekana sikhľuvahas, so te phenel le manušenge abo sar te davkerel amare kňižki the časopisa. Akana kamas te el feder andre oda, sar le manušenca vakeras. Kamas le manušenge te sikavel amaro kamiben oleha, hoj vakeraha pal oda, pal soste on rozmišľinen. Vašoda na vakeraha ča oda, so peske pripravinďam, aľe kamas te dikhel, so o manuša predživen, so ciťinen a so len trapinel. A kadi brožura amenge andre kada pomožinela. Sar?

Andre kadi brožura hin 12 lekciji. Rozkiden, sar šaj avas feder manuša. A kavka džanaha le manušenge feder te presikavel o kamiben a te kerel lendar le učeňiken. Sako jekh lekcija hiňi zathoďi pro pribehos andal e Biblija. Dikhena, savo sas o Ježiš abo aver džene ko manuša andre služba. Na džal amenge ča pal kada, kaj te sikhľuvas, so lenge te phenel. Aľe kamas, kaj te ciťinen, hoj len rado dikhas. Andre služba amenge furt kampel te presikavel savore vlasnosťi. Aľe dikhaha, save kamas te el a so kamas te presikavel, te varekaha chudas e duma, te varekaha pale das duma abo te ľidžas o študijum.

Paš dojekh lekcija rozmišľin, sar kadi vlasnosť šaj presikaves le manušenge khatar tute. Aľe o kamiben tuke nekbuter pomožinela te kerel le učeňiken. Vaš oda ker, so pes del, kaj mek buter te kames le Jehovas the le manušen.

Sam igen rade, hoj kadi buťi šaj keras tuha jekhetane. (Sof. 3:9) Dureder kam le manušen a ker lendar učeňiken. O Jehovas mi el tuha andre kadi buťi a mi del tuke baro lačhipen!