Мила пхралален тай пхенялен,

Аме „жас тай керас ученикиен саворе народовиендар, като покръстинас лен“, соскето дехас е Девлес тай е манушен. (Мат. 28:19, 20; Мар. 12:28-31) И любов, която на дикхел само песке, си бут зорали. Ой ащи те ресел жи ко сърца е манушенгере, колато „вогиестар манген те жанен и истина, която анел вечно животос“. (Деян. 13:48)

Преди най-важно аменге сине те помнинас точно со те пхенас е манушенге тай те мукас ленге лила, колато те четинен. Акана требе те дас всичко амендар, за те сикльовас те хоратинас по-лачшес е манушенца. Мангас те сикавас любов кариг ленде, като хоратинас букиенге, колато си интересна ленге. Аке соске требе те овас готова те променинас и тема, колаке хоратинас, тай те мислинас е букиенге, коленге о мануш хал холи тай е букиенге, колато си леске важна. Сар кайка брошура ка помагинел аменге?

Калке брошурате иси 12 урокя, колендар сикльовас саве качества требе те овен амен, за те ащи те сикавас любов тай те керас ученикиен. Секоне урокиесте дикхас йекх качество, ковато о Исусес или авер проповедники таро първо веки сикавелас анди служба. На мангас те сикльовас наизуст о примерна разговоря, а те дикхас сар те сикавас амари любов кариг о мануша. Кана проповединас, винаги требе те сикавас секо йекх таро качества, коленге пишинел калке брошурате. Ама ки брошура ка дикхас кола таро качества требен аменге най-бут, кана започнинас разговори е манушенца, кана жас пак паш ленде тай кана изучинас и Библия ленца.

Кана четинен секо йекх уроки, мислинен шукар сар ащи те сикавен о качество, колеске пишинел ко уроки, кана хоратинен е манушенца отхе, кате бешен. Ден всичко тумендар, за те барярен тумари любов кариг о Йехова тай кариг о мануша. И любов по-бут саворе авере букиендар ка помагинел туменге те керен ученикиен.

Аменге си бари чест те проповединас заедно туменца пико жи пикесте. (Соф. 3:9) Продължинен те сикавен любов кариг о мануша тай те керен ученикиен тай о Йехова ка благословинел тумен бут!