Кучутнэ ԥрала и ԥэя!

И любовь каринг о Дэл и каринг и мануша побудий амэн тэ терас кода, со ԥэндя о Иисусо: «Жан каринг всаворэ народоря и, кай тэ поможын лэ манушэнди тэ ашэн ученикоря, болэн лэн» (Матф. 28:19, 20; Мар. 12:28—31). Кай и чачуни любовь исин фартэ баро зор. Вой можэт тэ лэл лэ одестар кодэлэн, кастэ оди цырдэл «каринг о чачимос, саво андярэл каринг и вечно жызня» (Дила 13:48).

Раньшэ амари цэль сас тэ висытювас преподнесения и тэ ашавас лэ манушэсти библейски публикацыи, но акана амэ сытювас просто тэ дас дума лэ манушэнца. Амэнди важно тэ сыкавас и любовь каринг и мануша и тэ дас дума пала кода, со интересно лэнди. Важ када трэбуй тэ авас гибки и тэ старысавас тэ полас, пала со гиндон и мануша и пала со вонэ пэрэжывают. Кай амэндэ тэ вижал када тэ стерас, амэнди поможыя кадэя брашура.

Андэ кадэя брашура 12 урокоря. Андэр лэндэ росԥэнэнпэ пала 12 качестворя, савэ поможына амэнди тэ сыкавас каринг и мануша и любовь и тэ поможысарас лэнди тэ ашэн ученикоря. Кажно уроко стердо па библейски стихоря, андэ савэ дицол, сар о Иисусо или авэр проповеднико анда пэрво вико сыкавэлас варисаво анда кадэла качестворя. Всаворэ качестворя розделимэ пэ трин части: 1) кодэла, савэ трэбуй амэнди, кала залас и дума; 2) кала поможысарас, кай лэ манушэстэ тэ авэл май баро интересо; 3) кала амэ проандярас изучения Библии. Канешно, всаворэ кадэла качестворя трэбуй амэнди андэ вся амари служэния, важ кода кай амари цэль — тэ родас возможность тэ сыкавас каринг и мануша и любовь, ай най тэ ԥэнас кода, со висытелям наизусть.

Кала роздиқэс кажно качество, погиндосар, сар ту моӷ бы тэ сыкавэс лэс, кала дэс дума лэ манушэнца котэ, кай ту жувэс. Стов зор, кай май фартэ тэ любис лэ Иеговас и лэ манушэн. Имено и любовь, ай най кода, сар ту ӷанэс тэ дэс дума, поможыя тути тэ сытярэс лэ манушэн, кай вонэ тэ ашэн ученикоря.

Важ амэндэ бари бах тэ служысарас вмести туса (Соф. 3:9). На параш тэ любис лэ манушэн и тэ сытярэс лэн! Амэ мангаспэ, кай о Иегова щедро тэ блаӷословий о зор, саво ту стос.