Bene Wirhu na Bali Birhu Bazigirwa:

Obuzigire kuli Nnâmahanga n’oku bantu bunarhushumye ‘rhugende . . . rhunajire abanafunzi omu mashanja goshi, rhunababatize.’ (Mt. 28:19, 20; NWT; Mk. 12:28-31) Obuzigire burhajira kabôlo bujira emisi. Bwanahuma oku mirhima y’abantu “balonzize okuyishiba n’obuzine bw’ensiku n’amango.”—Ebj. 13:48, NWT.

Omu mango gageraga, rhwakag’isegeza obwenge oku kubîka omu bukengere enjira z’okurhondeza enganîro n’oku kuhâna ebicapo. Mwa gano mango rhushinganine rhusegeze obwenge oku njira y’okuganîra n’abantu yakalerha amalehe minja. Rhushinganine rhuyereke abandi obuzigire omu kubaganîrira emyanzi yakabashagulusa. Kuli kuderha oku rhushinganine rhucipatanise n’akanga ka ngasi muntu omu kushibirira ebimubabazize n’amalagirire gage. Gurhi eyi broshire yakarhurhabalamwo okujira ntyo?

Eyi broshire egwerhe masomo 12 gakarhurhabala rhukuze amorhere rhulagirireko lyo rhuyereka abandi obuzigire n’okujira abanafunzi. Ngasi isomo liyimangire oku mwanzi gw’Ebibliya guyerekine gurhi Yezu erhi owundi muhubiri w’omu myaka igana mirhanzi ayerekine borhere bulebe bw’obulagirire bwenene omu mukolo gw’amahubiri. Omuhigo gwirhu gurhali gwa kubikirira omu bukengere enjira z’okurhondezamwo enganîro, cikone guli gwa kulonza enjira z’okuyerekana oku rhuzigire abantu. Ciru akaba ngasi borhere buli bwa bulagirire omu bigabi byoshi by’omukolo gw’amahubiri, rhwabona bulya gurhi morhere maguma na maguma gali ga bulagirire bwenene amango g’okurhondeza enganîro, okugalukira abantu, n’okulongoza amafunzo g’Ebibliya.

Amango oli wasoma ngasi isomo, orhanye bwenene gurhi wakayerekanamwo oborhere bulimwo, amango oli waganîra n’abantu b’emunda oba olamire. Ojire okwawe koshi ly’okuza obuzigire bwawe kuli Yehova na kuli abantu. Kulusha ngasi bulenga boshi wakakolesa, obo buzigire bo bwakurhabala okuhikiriza omuhigo gwawe gw’okujira abanafunzi.

Rhushagalukire bwenene olukengwa rhugwerhe lw’okukola omu cinyabuguma haguma na ninyu. (Sof. 3:9) Yehova amugishe bwenene omu mukolo gwinyu gw’okugendekera mwazigira abantu n’okujira abanafunzi!