Muxxe Roduuwa:

Maganohonna mannaho noonke baxilli, ‘haˈne, daga baalante giddonni manna rosaano assineemmo gedenna cuuˈneemmo’ gede kakkayisannonke. (Mat. 28:19, 20; Maq. 12:28-31) Wolu qiniite balaxisiisanno baxilli lowo wolqa afiˈrino. Hegere heeshsho aanno halaali widira hige dooino wodani noonsare loosoho kakkayisara dandaanno.—Soq. 13:48.

Alba, soqqanshote hasaawu bitima rosiisiˈne hakkoye yaanna borro ela roorsineemmo. Xa kayinni manna hasaawisate dandoonke woyyeessiˈrate sharrammeemmo. Insa baxissinonsa hajo daafira kayinse hasaawa hasiˈneemmo. Tini insara noonke baxille leellishshanno. Mannu hasaawa baxannore kayinse hasaawate, hasaawa soorranna mitto mittonka mancho baxisannore afate seekkine heda hasiissannonke. Tini borro tenne assate kaaˈlitannonkehu hiittoonniiti?

Tini biroshere baxille leellishatenna manna rosaano assate kaaˈlitanno akatta kulannoha 12 roso afidhino. Mittu mittunku rosi, Qullaawu Maxaafi xagge aana xintaminoho; tini xagge Yesuusi woy umi xibbi diri Kiristaani soqqanshote yannara leellishino akata kultannote. Mixonke hasaawu bitima rosiisiˈne hakkoye yaa ikkitukkinni, mannaho baxille leellisha dandiineemmo doogga hasiˈrate. Mittu mittunku akati duuchunku gari soqqanshora kaaˈlannoha ikkirono, mite akatta roorenkanni hasaawa hananfeemmo woyitira, manna wirro hasaawinseemmo woyitira, woy Qullaawa Maxaafa xiinxallinseemmo woyitira kaaˈlitannonke gara laˈneemmo.

Mitto mittonka roso xiinxallitinanni woyite, qooxeessiˈnera manna hasaawissinanni yannara tenne akatta leellisha dandiitinanni gara seekkitine hedde. Yihowaranna mannaho nooˈne baxilli lexxanno gede sharramme. Aye ogimmanni roore, manna rosaano assate loosi qinaannoˈne gede kaaˈlannoˈnehu konne baxilleeti.

Kiˈne ledo miilooˈmine mitteenni loosa lowo geeshsha banxeemmo. (Sof. 3:9) Mannaho baxille leellishshinanninna rosaano assitinanni woyite Yihowa maassiˈroˈne!