Rahalahy noho anabavy,

Tea a-Ndranahary noho ty olo hafa tsika ka zay ro mahavy antsika manao ani-raha volanini-Baiboly toy: ‘Mandehana, ampianaro ty olo amy firenena iaby mba ho lasa mpanori-dia ahy. Anovo batisa rozy.’ (Mat. 28:19, 20; Mar. 12:28-31) Mahery ty tena fitiava. Laha mana ani-fitiava io tsika le afaky hanampy ani-ze olo ‘mana fo soa mba hahazoa fiaina mandrakizay.’​—Asa. 13:48.

Nifantoky tamy raha horesahy noho fametraha boky noho gazety avao tsika taloha. Fe henanizao tsika miezaky mba hahay hiresaky amin’olo. Teantsika haseho amin’olo hoe teantsika rozy ka ze raha mahakinto an-drozy ro resahintsika amin-drozy. Hita baka amy zay hoe mahay mandanjalanja tsika sady mandiniky soa ze raha ilàn’olo kiraidraiky. Hanampy antsika hahavita ani-zay bokikely toy. Amy fomba akory?

Misy fianara 12 bokikely toy. Ampianary antsika ato ty toetsy mila ananantsika mba hahafahantsika mampiseho fitiava noho manao mpianatsy. Misy tantara baka amy Baiboly ao ty fianara kiraidraiky. Hita ao ty fomba nampisehoani-Jesosy na ty mpianatsy hafa tamy taonjato voalohany ani-toetsy voaresaky amy fianara ao iny lafa rozy nanompo. Ty raha kendrentsika le tsy hoe hitiaro hevitsy horesahy avao fa hila fomba hampisehoa koa hoe tea olo tsika. Marina fa samby ilà iaby toetsy voaresaky ato reo lafa tsika manompo. Fe hodinihintsika hoe manino ty toetsy sisany ro tena ilà lafa tsika manombo-dresaky, manao fimpolia mitsidiky, na mampianatsy Baiboly.

Lafa mandiniky ty fianara kiraidraiky iha, le eritsereto hoe akory ty azonao ampisehoa ani-toetsy iny lafa iha miresaky amin’olo mbaminareo eny. Miezaha ho tea marè ani-Jehovah noho ty olo hafa. Ndre ino ino ty fomba fitoria ampiasanao, le fitiava zay ro tena hanampy anao hiezaky hanao mpianatsy.

Tombotsoa bevata ho anay ty miaraky miasa aminareo sady tena teanay. (Zef. 3:9) Hitahy anareo lahy Jehovah satria miezaky ho tea olo avao nareo ka mampianatsy an-drozy!