Uso ma tuafāfine peleina:

O le alofa i le Atua ma tagata e uunaʻia ai i tatou e “ō atu e fai tagata o nuu uma lava ma soo, ma papatiso atu iā i latou.” (Mata. 28:​19, 20; Mare. 12:​28-31) E matuā malosi le alofa lē manatu faapito. E mafai ona iai se aafiaga tele i “ē ua saunia o latou loto mo le ola e faavavau.”—Galu. 13:48.

I le taimi ua teʻa, sa tatou taulaʻi i le taulotoina o taulimaga ma ofo atu lomiga. Ae i le taimi nei, ua manaʻomia ona faaleleia o tatou tomai e talanoa ai ma tagata. E tatou te mananaʻo e faaalia le alofa i isi e ala i le talanoa i mataupu e latou te naunau i ai. E aofia ai le fetuutuunaʻi ma le manatu mamafa i popolega ma mea e naunau i ai tagata taʻitoʻatasi. E faapefea ona fesoasoani lenei polosiua e tatou te ausia ai lenā sini?

E 12 lesona o le polosiua o loo faamatilatila mai ai uiga e manaʻomia ona tatou atiaʻe, ina ia faaalia ai le alofa ma faia isi ma soo. E faavae mai lesona taʻitasi i se tala o le Tusi Paia, lea na faaalia ai e Iesu po o se isi faievagelia i le uluaʻi senituri se uiga patino a o auai i le faiva. O lo tatou sini o le saʻili o auala e faaalia ai le alofa i tagata, ae lē o le taulotoina o taulimaga. E manaʻomia ona faaalia uiga taʻitasi i vala uma o la tatou faiva. Peitaʻi, o le a tatou iloiloina māfuaaga e matuā manaʻomia ai ni uiga patino pe a amata ni talanoaga, faia toe asiga, pe faia suʻesuʻega faale-Tusi Paia.

A o iloiloina lesona taʻitasi, ia mafaufau lelei pe e faapefea ona outou faaalia lenā uiga a o talanoa atu i tagata i lo outou vaipanoa. Ia taumafai e faamalosia lo outou alofa iā Ieova ma tagata. O lenā alofa lea e sili atu i se tomai patino, o le a fesoasoani iā te outou e ausia ai le sini o le faia o isi ma soo.

E matou te talisapaia le faaeaga tautele o le auauna soosootauʻau ma outou. (Sefa. 3:9) Tau ina ia matuā faamanuia atu Ieova iā te outou, a o faaauau ona outou faaalia le alofa i tagata ma faia isi ma soo!