Bazalwane Nabodzadze Labatsandzekako:

Kutsandza Nkulunkulu kanye nebantfu kusikhutsata kutsi ‘sihambe sente bantfu bato tonkhe tive babe bafundzi, sibabhabhatise.’ (Mat. 28:19, 20; Mak. 12:28-31) Lutsandvo lunemandla. Lungatsintsa tinhlitiyo talabo labatimisele “kutfola kuphila lokuphakadze.”​—Imis. 13:48.

Esikhatsini lesendlulile, besinaka kakhulu kutibamba ngenhloko tincociswano kanye nekuhambisa tincwadzi. Nyalo sidzinga kutfutfukisa likhono letfu lekucoca nebantfu. Sifuna kukhombisa bantfu kutsi siyabatsandza ngekutsi sikhulume ngetintfo letitobakhanga. Loku kusho kutivumelanisa netimo, kunakisisa tintfo letimkhatsatako loyo muntfu kanye netintfo letimkhangako. Lencwajana itasisita njani kutsi sikhone kukwenta loko?

Lencwajana inetifundvo letingu-12 letisifundzisa ngebuntfu lokudzingeka kutsi sibe nabo kute sikhone kukhombisa lutsandvo siphindze sente bafundzi. Sifundvo ngasinye sisekelwe endzabeni leseBhayibhelini lekhuluma ngebuntfu lobakhonjiswa nguJesu kanye nalamanye emaKhristu angelikhulu lekucala emsebenti wekushumayela. Umgomo akusiko nje kubamba ngenhloko tincociswano, kodvwa kufuna tindlela lesingakhombisa ngato kutsi siyabatsandza bantfu. Nanobe buntfu ngabunye budzingeka kuto tonkhe tinhlobo tekushumayela, kepha sitawuphindze sibuke nekutsi bubaluleke ngani buntfu lobutsite nasicalisa tincociswano, nasesibuyela kulabo lesicoce nabo nalapho sesidadisha nebantfu liBhayibheli.

Njengobe udadisha sifundvo ngasinye, cabangisisa ngendlela longakhombisa ngayo buntfu lobutsite nawucoca nebantfu endzaweni lohlala kuyo. Yetama kukhulisa indlela lomtsandza ngayo Jehova kanye nebantfu. Lutsandvo, ngibo buntfu lobuhamba embili lobutakusita kutsi ukhone kufinyelela umgomo wakho wekwenta bafundzi.

Silijabulela kakhulu lelilungelo lesinalo lekusebenta kanye nani lihlombe ngelihlombe. (Zef. 3:9) Shengatsi Jehova anganibusisa kakhulu njengobe nichubeka nitsandza bantfu futsi nenta nebafundzi!