Mwe Balupua ni Bankazi Batonua:

Kumutona Leeza ni kubatona bantu, kuli kwatukinkizia ‘tuye tukite basambi kufuma ku bantu ba ntundu yonse, ni kubabatizia.’ (Mat. 28:19, 20; Mark. 12:28-31) Ntono ya kupeelana, ili ni buviinde bukata saana. Ntono ya evio, kunti yabakumia ku mutima baalia bali ni “aali iweeme ya mutima palua bukose bwa loonse.”—Miil Bat. 13:48.

Musita wakipita, twakiba twapooza saana maano ku kubiikilila vya kutendekezia bulondolozi, ni kumupeela muntu lupapulo. Loonu, tupalile kuwaamia bufundi bwetu bwa kulanziana ni bantu. Tutonene kubalangilila bange nangue tubatonene, kupitila kulanziana nabo maasi aalia ali abasaansamusia. I kulanda nangue, kuleenga kwaluluka ni kupoozako maano ku beelia bili mukuya byaemia kila muntu ni ku beelia byatonene. Eezi broshua, ili kutukwasia siani tuviinde kukita evio?

Eezi broshua, ilimo masomo 12 aalia ali kuviinda kutusambilizia mibeele elia itupalile kuya twali nayo, eevi tubalangilile bantu ntono ni kukita basambi. Kila lisomo, lilimo mpunda ili mu Bibilia ilandiile palua mibeele yaalangiliile Yesu ao kasimika unge wa mu miaka mia ya ku ntendeko mu miilo ya kusimikila. Kikata kya aza masomo, te kubiikilila vya kutendekezia bulondolozi; inzi, kukeba nzila ya kulangilila nangue tubatonene bantu. Atasie kine mibeele ili moomu tupalile kuilangilila mu miilo yetu yonse ya kusimikila, tuli kumona mibeele paleepale itupalile kulangilila aasa lutuli twatendekezia bulondolozi, lutuli twababwelela bantu ao lutuli twatungulula masambililo a Bibilia.

Musita luuli kuya wasambilila kila lisomo, tontonkania wapoozeleko saana maano ku keelia kiuli kukita eevi ulanziane buino ni bantu bali pa fuasi pawikeele. Ikwinde kumutona saana Yehova pamo ni bantu. Kuliko bufundi bobonse buuli nabo, ezio ntono, ili kukukwasia ufikilizie mupaango obe wa kukita basambi.

Twatasia saana juu ya leeli lisyuko lituli nalio lya kubomba pamo ni mwemue. (Zef. 3:9) Yehova amipaale saana musita umutwaliliile kutona bantu ni kukita basambi!