Ry Rahalahy Naho ry Rahavave:

Ty hateantikagne an’Andrianagnahare naho o ndatio, le mandrisike antikagne ‘hampianatse ze ndaty amy ty firenena iaby, sady hanao badisa iareo.’ (Mat. 28:19, 20; Mar. 12:28-31) Naho managne ze hatea zay tikagne, le hahavita hagnampe ze “ndaty managne toe-po soa mba hahazoagne i havelogne nainai’ey.”​—Asa. 13:48.

Taloha tikagne, le nifantoke amy ty fitadidiagne ty hevetse azo rehafegne amo o ndatio naho amy ty fanoloragne boke aman-gazete. Faie amy izao tika, mila magnasoa ty fomba ifampirehafantikagne amy iareo. Teantika hatoro fa teantikagne iareo, le ze foto-kevetse mahaliagne iareo ro rehafentikagne ama’e. Ty dika izay, mila magnovaova ty raha rehafentikagne tika sady mandineke soa ze raha mampinekoneko naho mahaliagne ty ndaty tsikiraidraike. Afake magnampe antika hahavita izay ty bokekele toy. Fa nagnino?

Misy lesogne 12 ty ato, hagnampe antika hanagne ty toetse ilaegne mba hahavy antikagne hampiseho hatea sady hahavita hanao mpianatse. Hotrea amy ty lesogne tsikiraidraike ty toetse naseho i Jesosy naho ty mpitory tamy ty taonjato voaloha’e naho fa nanao ty fanompoa’e iareo. Ty tanjogne, le ty hahavy antikagne hahatrea fomba hanoroagne ty hateantikagne o ndatio, fa tsy ty hitadidiagne i hevetse azo rehafegney. Sambe ilaegne amy ty fanompoagne ataontikagne i toetse kristiana rey. Faie hotreantikagne ato tie, nagnino ty toetse ila’e ro tena ilaegne naho fa manombo-drehake, naho fa miheregne mitilike ndra naho fa mampianatse Baiboly.

Naho fa mianatse ty lesogne tsikiraidraike rehe, le dineho tie akore ty azo’o ampisehoagne i toetsey naho fa mifampirehake amy ty ndaty amy ty faritane’areo ey. Mikezaha hampitombo ty hatea’o i Jehovah naho o ndatio. O hatea iohoe ty tena hagnampe azo hagnatratse i tanjo’o hanao mpianatsey ankoatse ty teknike hafa.

Tena mahafale anay ty hiara-hiasa ama’o sady tombotsoa lahibey zay. (Zef. 3:9) Lonike abey ty Jehovah hitahy azo, amy ty fanohiza’o hampiseho ty hatea’o o ndatio naho ty fampianara’o iareo!