Iinacan keda Ainacan:

Amina Edeke keda amina itunga nges einakinit oni ‘alosit aituluor lukatekerin kere ikesisiak ka aibatisa kes.’ (Mat. 28:​19, 20; Mk. 12:​28-31) Amin nakabeit erai naepol agogong, ido arai ijaatar oni kamin naepone kangol, ipedori oni aingarakin ngul “luelosikinito aijar naka ikar kere.”​—Aswamisio 13:48.

Kokar luatuboros, kipodokinit oni aitwasam aitetemonoreta ka akorar itaabon. Konye kwana ikoto oni aswam kagogong aitojokaar epone loinerar oni keda itunga. Ekot oni aitodikin itunga amin kopone loka aimor kakes akiro nuepodokinitos kesi. Apolouke ebe ekoto oni akapakina aijulakin akirowok kasodete einer akiro nuepodokinitos itunga arai bo nueminasi kesi. Epone ani ingarakinia aburocua na oni aswam ngun?

Ejaatar aburocua na keda aisisiaeta 12 nuitodunitos iponesio luibusakinit oni aipepeun tetere ipedori aitodikin itunga amin ka aitaraun kesi ikesisiak. Kanginisisiaet elemunitai kotoma akiro nuka Ebaibuli nuitacaunitos ediopepone loabu Yesu arai bo idiopet Kokristayon lukolo sek kitodu kotoma alimonokin. Alosikinetewok mam erai apodokinit aitwasam aitetemonoreta konye erai aomoom iponesio luipedoria oni aitodikin itunga amin. Karaida ibusakinit oni aitodun kangolipone kotoma alimonokin naka ejautene edio kere, ibuni oni airereor kanuinyo ipudar oni cut ice koponesio kalu naitegeara oni einer, kabongonoreta, arai bo naisisia oni Ebaibuli keda itunga.

Kotoma kanginisisiaet, koomoom nuipedori ijo aswam kanu aitodun ediopepone loisisiau ijo nainerar ijo keda itunga luka atutubetekon. Iswama kagogong aitogogong aminakon kanuka Yawe keda itunga. Adepar epone edio kere loipedori ijo aitodun, amina ngin ngesi ingarakini ijo aitodolikin alosikinetekon naka aituluor itunga ikesisiak.

Isiyalamikinit sio arereng naka aswam nepepe kajo. (Sep. 3:9) Kisirereng Yawe ijo noi kanu ainyikokinit amin itunga ka aituluor kes ikesisiak!