Hen Anmgbianev mba Nomso man mba Kasev:

Er Aôndo a doo se ishima kua ior yô, dooshima la ka a mgbegha se u eren kwagh u Bibilo i kaa ér, “za gema nen ior mba ken akuraior cii ve hingir mbahenen, eren nen ve batisema” la. (Mat. 28:19, 20; Mar. 12:28-31) Dooshima u tangen iyol ga la ngu a tahav. Ka a bende a mba ve “lu a ishima i mimi i zuan a uma u tsôron la.”—Aer. 13:48.

Kera yô, ka se hemba veren ishima sha u dondon akav a tesen er se za lam a ior shi se na ve ityakeda la. Hegen ne gba u se seer fan igbenda i se lam a ior yô. Se tese ser ior doo se ishima sha u lamen a ve sha atineakaa a aa kôr ve ken ishima yô. Inja na yô, gba u se ver ishima u fan mbamlu mba iorov sha er se lam a hanma or sha gbenda u a kôr nan ken ishima yô. Antakeda ne una wase se u eren kwagh la nena?

Antakeda ne ngu a mtom 12 ma ma tese se aeren a i gbe u se lu a mi ve ior vea doo se ishima shi se tesen ve yô. Ken hanma ityough yô i ter ma ieren i Yesu gayô i Mbakristu mba sha ayange a mbaapostoli la lu a mi shighe u vea pasen kwagh yô. Awashima wase ka u fan akav a tesen er a lam a ior la kôron ken ityou ga, kpa ka u eren kwagh a ior sha inja i tesen ér ve doo se ishima. Er hanma ieren i lu hange hange sha hanma gbenda u se pasen kwagh nahan kpa, se nenge er aeren agen a hembe lun hange hange shighe u se hii iliam a or man shighe u se hidi u za sôron or shin shighe u se lu henen Bibilo a or yô.

U nguren timen sha hanma ityough yô, henen sha gbenda u u tese ieren i i tim sha mi la shighe u u lu lamen a ior hen ijiir you yô. Yehova kua ior ve seer doon we ishima. Dooshima la una hemba wasen we u geman ior hingir mbahenen a hanma gbenda ugen u pasen kwagh cii.

Ka se kwagh u icivirigh kpishi u eren tom ne a ven imôngo a ishima i môm. (Sef. 3:9) Yehova a ver ne doo doo, er ior ve doo ne ishima shi ne lu tesen ve yô!