Siʻi Fanga Tokoua mo e Fanga Tuofāfine:

Ko e ʻofa ki he ʻOtuá mo e ʻofa ki he kakaí ʻokú ne ueʻi kitautolu ke tau “ō ʻo ngaohi ko e kau ākonga ʻa e kakai ʻo e ngaahi puleʻanga kotoa pē, ʻo papitaiso kinautolu.” (Māt. 28:​19, 20; Mk. 12:​28-31) Ko e ʻofa taʻesiokitá ʻoku mālohi. ʻOku lava ke aʻu ki he loto ʻo e faʻahinga ʻoku “hehema totonu ki he moʻui taʻengatá.”—Ngā. 13:48.

ʻI he kuohilí, naʻa tau tokangataha ki hono ako maʻuloto ʻa e ngaahi tuʻuakí pea mo tuku ha tohi. ʻI he taimí ni ʻoku fiemaʻu ke tau ngāue ke fakaleleiʻi ʻetau pōtoʻi ʻi he fetalanoaʻakí. ʻOku tau loto ke fakahaaʻi ʻetau ʻofa ki he niʻihi kehé ʻaki ʻa e talanoa fekauʻaki mo e ngaahi kaveinga ʻoku nau mahuʻingaʻia aí. ʻOku ʻuhinga iá ko e hoko ʻo ngaofengofua pea fakakaukau fakalelei ki he ngaahi meʻa ʻoku tokanga mo mahuʻingaʻia ai ʻa e tokotaha taki taha. ʻE lava fēfē ke tokoni ʻa e polosiua ko ení ke tau fai iá?

Ko e polosiuá ʻoku ʻi ai ʻa e ngaahi lēsoni ʻe 12 ʻoku akoʻi mai ai ʻa e ngaahi ʻulungaanga ʻoku fiemaʻu ke tau fakatupulekina kae lava ke tau fakahāhā ʻa e ʻofá pea ngaohi ākonga. Ko e lēsoni taki taha ʻoku makatuʻunga ʻi ha talanoa Fakatohitapu ʻa ia naʻe fakahāhā ai ʻe Sīsū pe ko ha ʻevangeliō ʻi he ʻuluaki senitulí ha ʻulungaanga pau ʻi he ngāue fakafaifekaú. Ko e taumuʻá ʻoku ʻikai ko hono ako maʻuloto ʻa e ngaahi tuʻuakí ka ke kumi ki ha ngaahi founga ke fakahāhā ʻetau ʻofa ki he kakaí. Neongo ʻoku fiemaʻu ʻa e ʻulungaanga taki taha ki he ngaahi tafaʻaki kotoa ʻetau ngāue fakafaifekaú, te tau lāulea ki he founga ʻoku fiemaʻu ai ʻa e ngaahi ʻulungaanga pau tautefito ki hono kamataʻi ha fetalanoaʻaki, fakahoko ʻa e ngaahi toe ʻaʻahí pe fakahoko ʻa e ngaahi ako Tohi Tapú.

ʻI hoʻo vakaiʻi ʻa e lēsoni taki taha, fakakaukau fakalelei ki he founga ʻe lava ke ke fakahāhā ai ʻa e ʻulungāngá ʻi hoʻo talanoa ki he kakai ʻi ho feituʻú. Feinga ke fakalolotoʻi hoʻo ʻofa kia Sihova pea ki he kakaí. Ko e ʻofa ko iá te ne tokoniʻi koe ke aʻusia hoʻo taumuʻa ke ngaohi ākongá, ʻo mahulu atu ia ʻi ha faʻahinga founga pē.

ʻOku mau houngaʻia ʻi he monū lahi ko ia ke ngāue uma ki he uma mo koé. (Sēf. 3:9) ʻOfa ke tāpuakiʻi lahi koe ʻe Sihova ʻi hoʻo hokohoko atu ke ʻofa ki he kakaí pea ngaohi ākongá!