Vandriyathu nyo Golege,

Lihaladzo lathu khu Nungungulu ni vathu li ngu hi kutsa gu ‘gimbiya ni gu gira vapizane vathu nya mayigo yatshavbo, nigu va bhabhatisa.’ (Mat. 28:19, 20; Marko 12:28-31) Lihaladzo nya lisine li na ni tshivba. Ilo li nga si kodza gu kuha myonyo nya vathu ‘va dzi emisedego gu hakha womi nya gupindruge.’ — Mith. 13:48.

Gale hi di gu dhekorari mabelelo ni gu hi di gu ningeya mabhuku basi. Olu hi yede gu tshukwadzisa makodzelo yathu nyo bhule ni vathu. Hi yede gu yeyedza lihaladzo vathu khu gu ganeya khu mahungo ma tsakisago vathu. Khu kharato hi yede gu dzi pwananisa ni giemo gya muthu ni muthu gasi vatshavbo va wuyedwa. Broxura yeyi yi na hi phasa kharini gu gira isoso?

Broxura yeyi yi nani 12 sihevbulo si yeyedzago makhalelo hi yedego gu ma haguleya gasi hi kodza gu yeyedza lihaladzo nigu gira vapizane. Gihevbulo ni gihevbulo gya gu seketedwa omu nya matimo nya Bhibhiliya ma yeyedzago esi si giridwego khu Jesu mwendro makristo nyo pheye tepo ma nga ba ma tshumayela. Makungo yathu khandri gu dhekorari mabelelo, ganiolu khu gu hi vbweta dzindziya nya gu yeyedze lihaladzo lathu khu vathu. Ambari olu yatshavbo makhalelo yaya nya 12 ma gu ni lisima gutshumayelani, hi yede gu wona edzi hi nga thumisago khidzo mambe makhalelo yoyo gasi gu pheya khayo mabhulo, gu gira liendro nyo bweleleye mwendro gu gimbidzisa gihevbulo.

Avbo nya gihevbulo ni gihevbulo, dundrugeya gwadi khedzi u nga yeyedzago khidzo likhalelo lolo tepo u bhulago ni vathu va gipandreni gyago. Dzi garadzeye gu yeyedza lihaladzo lago khu Jehovha ni vathu. Gu vbindra ni yavbini magirelo, lihaladzo lago khu vathu li na gu phasa gu vboheya makungo yago nyo gire vapizane.

Gwathu lithomo nya likhongolo ngudzu gu thuma gumogo nanu khu monyo mowo. (Sof. 3:9) Ho lomba gu khethu Jehovha a simama gu kategisa gu dzigaradza gwanu nyo yeyedze lihaladzo ni gu gira vapizane!