Nomuyandwa Bakwesu Abacizyi:

Kuyanda Leza abantu kulatukulwaizya ‘kuunka kuyooyiisya bantu bazisi zyoonse kuti babe basikwiiya, akubabbapatizya.’ (Mt. 28:19, 20; Mk. 12:28-31) Luyando lwini-lwini lulaanguzu nkaambo lulakonzya kubagwasya ‘aabo ibali amyoyo mibotu, ibalibambilide kutambula buumi butamani.’—Mil. 13:48.

Kaindi, twakali kubikkila kapati maano kuswatila mbotukonzya kutalisya mibandi alimwi akwaabila zyakumwaya. Pele mazuba aano tubikkila kapati maano kuyungizya luzyibo lwesu kujatikizya mbokutalisyigwa mibandi. Tweelede kutondezya luyando kubantu kwiinda mukubandika ambabo makani aabakkomanisya. Eeci caamba kuti tweelede kunyoneka akubikkila kapati maano kuzintu muntu nzyalibilika alimwi anzyakkomanina. Ino broshuwa eeyi ilatugwasya buti mumakani aaya?

Broshuwa eeyi ijisi ziiyo zili 12 izibandika bube mbotweelede kuba ambubo kutegwa katutondezya luyando akubagwasya bantu kuba basikwiiya. Ciiyo cimwi acimwi ciyeeme acibalo camu Bbaibbele calo icaamba kujatikizya bube bugaminide oobo Jesu naa Banakristo bamumwaanda wamyaka wakusaanguna mbobakatondezya mumulimo wabo wakukambauka. Mbaakani yesu taili yakuswatila mbokutalisyigwa mibandi, pele njakulangaula nzila mwalo motukonzya kutondezya luyando kubantu. Nokuba kuti bube bumwi abumwi bulayandika mumbazu zyoonse zyamulimo wesu wakukambauka, tulalanga-langa kuba abube bumwi mbokuyandika kapati ciindi notutalisya mubandi, notucita nyendo zyakupilukila naa ciindi notusololela ziiyo zya Bbaibbele.

Ciindi nomulanga-langa ciiyo cimwi acimwi, amuzinzibale kuyeeya mbomukonzya kububelesya bube oobo ciindi nomubandika abantu mucilawo canu. Amusolekesye kuyumya luyando ndomujisi kuli Jehova alimwi akubantu. Kutondezya luyando oolo nenzila iiyandika kapati iiyoomugwasya kuzuzikizya mbaakani yanu yakugwasya bantu kuba basikwiiya.

Tulalumba kucoolwe cipati cakubelekela antoomwe andinywe calukamantano. (Zef. 3:9) Eelo kaka Jehova amuleleke kapati ciindi nomuzumanana kubayanda bantu akubagwasya kutegwa babe basikwiiya!