Kala hermanoʼik:

Yuja jel xyajtaytik ja Dyos sok ja kristyanoʼiki, wa snikawotik bʼa skʼuʼajel ja mandar it: «Kaʼaxik sok awik och nebʼumanil ja kristyanoʼik bʼa spetsanil ja chonabʼiki. Awik yiʼ jaʼ» (Mat. 28:​19, 20; Mar. 12:​28-31). Yajni meran wala yajtanitiki, jelni ja yipi. Ja it ojni bʼobʼ kʼotuk man skʼujole «ja matik puesto aye bʼa stajel ja sakʼanil bʼa tolabida» (Hech. 13:48).

Ja bʼa tyempo ekʼta, jelni xkʼujolantik snebʼjel sjejelik sok yajelkanyi juʼunik ja kristyano. Pe ja wego wani xkʼanatik bʼa oj natik mas jastal ochel loʼil. Sok wani xjeʼatik ke wa xyajtaytik ja tuk yajni wala ochtik loʼil sbʼaja jas wa xcham skʼujole ja yeʼnleʼi. Yuja tuktukil kada kristyano, ja yuj tʼilani oj kʼul jbʼajtik adaptar sok yajel tʼabʼan jkʼujoltik ja jas wa xyiʼaj gusto sok wa xcham skʼujol ja matik wala ochtisok loʼili. ¡Ja juʼun it chapubʼal bʼa oj lajxukujtik skʼulajel!

Ja poyeto it ayiʼoj 12 sjejelik bʼa wa xchiktes 12 modoʼalik bʼa jelni tʼilan sjejel yajtanel sok yajel och nebʼuman. Kada xetʼan tini elel bʼa jun loʼil bʼa Biblia bʼa wa xchiktes jun modoʼal sjeʼa ja Jesús ja bʼa xcholjel ma june ja bʼa snebʼuman ja bʼa bʼajtan siglo. Ja jas wa xkʼanatiki mixani jaʼuk oj kaltik ja sjejelik bʼa jnebʼunejtiki, jani slejel modo bʼa sjejel ke wa xyajtaytik ja kristyano. Ama yibʼanal ja modoʼalik yiʼojan ja poyeto it jelni xmakunikujtik ja bʼa xcholjeli, pe ojni awil ke ay jujuntik jel tʼilan bʼa yajel kʼe jloʼiltik, bʼa kumxel ulatanel sok bʼa yajel estudio.

Yajni xa paklay kada sjejel, pensaraʼan lek jastal oj wa makunuk kada modoʼal bʼa xcholjel yabʼ ja kristyanoʼik ja bʼa wa lugari. Ja jastal wa xyajtaytik ja Jyoba sok ja kristyanoʼik mastoni jel tʼilan ke yuj chikan jas tikʼe yamkʼabʼal. Ja yuj kʼujolan ja janekʼ wa xbʼobʼawuj bʼa yajel kʼiʼuk ja yajtanel jaw. Ja jaw ojni skoltaya bʼa oj lajxukawuj jawa kʼelsati: yajel och nebʼuman.

Juni niwan cholal yaʼteltajel lajan ja Jyoba (Sof. 3:9). ¡Ja Jyoba aya koʼukawi jitsana lekilal yuja waxa kʼujolan syajtajel ja kristyano sok yajel och nebʼuman!