Kinatalankan tiku lu kkapaxkiyan:

Tapaxkit nema kgalhiniyaw Dios chu nema kakgalhiniyaw latamanin kinkamakgpuwantiniyan nakgalhakgaxmataw uma limapakgsin: «Kapitit chu kakamakgtayatit latamanin xliputum kachikinin xlakata kistalaninanin nawankgo, kakamunutit» (Mat. 28:​19, 20; Mar. 12:​28-31). Xaxlikana tapaxkit lu tliwakga. Tlan lakgchan xnakujkan latamanin tiku makgamakglhtinamputunkgo «xaxlikana tuku masta latamat nema ni kgalhi xlisputni» (Hech. 13:48).

Makgasa lu xliskujaw xlakata kalakaniya o de memoria xkatsiniw tuku xkawaniw latamanin chu xkamakgxtakgniyaw likgalhtawakga. Pero la uku tlakg xlakaskinka nakatsiniyaw la nakatakgalhchuwinanaw. Kalimasiyaniyaw tapaxkit latamanin akxni kalitachuwinanaw tuku xlakan katsiputunkgo. Chatunu chatunu latamanin tanu tanu tuku lilakgaputsakgo, wa xlakata talakaskin nalakgpalitilhayaw tuku nakalitachuwinanaw chu nalilakpuwanaw tuku max katsiputun tiku tachuwinamaw. ¡Uma likgalhtawakga tlawakanit xlakata tlan chuna natlawayaw!

Uma folleto limin akgkutiy takgalhtawakga nema lichuwinan akgkutiy tayat nema maklakaskinaw xlakata nakalimasiyaniyaw tapaxkit latamanin chu nakamakgtayayaw kstalaninanin Jesús nawankgo. Akgatunu takgalhtawakga takilhtiyanit tuku wan Biblia pi tlawalh chatum kstalanina Cristo tiku latamalh kxapulana siglo o tuku tlawalh Jesús akxni xmasiya xlakata Dios. La uku nialh kajwatiya kalitachuwinamputunaw latamanin tuku kalakaniya o de memoria katsininitaw, wata kalimasiyaniputunaw tapaxkit. Maski putum tayat nema lichuwinan uma folleto kinkamakgtayayan namakgantaxtiyaw kintaskujutkan, naʼakxilha pi makgapitsi tayat lu xlakaskinka nalimasiyayaw akxni matsukiyaw takgalhchuwin, akxni kalakgtaspitaw latamanin chu akxni makgalhtawakgenanaw.

Akxni nalikgalhtawakgaya pulakatunu takgalhtawakga, liwana kalilakpuwanti la tlan nakalimasiyaniya latamanin pulakatunu tayat akxni nakalitachuwinana Dios. Tapaxkit nema kgalhiniyaw Jehová chu nema kakgalhiniyaw latamanin tlakg xlakaskinka nixawa tuku lismaninitaw tlawayaw akxni lichuwinanaw Dios. Wa xlakata kaliskujti tlakg napaxkiya Jehová chu tlakg nakapaxkiya latamanin. Uma namakgtayayan namakgantaxtiya tuku putum kstalaninanin Cristo lakgchamputunaw: nakamakgtayayaw latamanin kstalaninanin Jesús nawankgo.

Akgtum lanka talakgalhaman pi akxtum skujmaw (Sof. 3:9). ¡Jehová kasikulunatlawalh putum tuku tlawayatit xlakata nakalimasiyaniyatit tapaxkit latamanin chu nakamakgtayayatit kstalaninanin Jesús nawankgo!