Juchaari erachiicha:

Jimbokachi xénchasïnga Tata Diosïni ka kʼuiripuechani, ísïchi úsïnga eska na uandajka ari juramukua: “Ní je ka jorhendaa je iámindu [...] kʼuiripuechani paraksï juchiiti chúxapatiini. Itsï ataa je” (Mat. 28:​19, 20; Mar. 12:​28-31). Engachi meru xénchaaska kʼuiripuechani, uaakachi mintsitarhu niárakuani ka i ambe kánikua jarhuatauati imeechani ‘engaksï mintsita jingoni uéjka tsípikua para méntkisï jatsini’ (Úku. 13:48).

Ióntkichi kánikua jánguarhintasïreenga jorhenguarhiani presentasioniichani ka publikasioniichani íntspiani. Joperu iásï, uétarhisïndi eskachi jorhenaaka néna uandontskuarheni kʼuiripu jingoni. Ka xarhatakuasïngachi eskachi xénchaasïnga engachi imeeri ambe uandontskuarhekuajka engaksï imeecha uékani jarhajka míteni. Nóksï iámindu kʼuiripuecha májkueniisti, jimbochisï no jatsika para méntkisï májkueni uékani aianguani Tata Diosïiri ambe ka ístuchi jatsiska para exeni ambe enga uandanhiatajka imani engachi uandontskuarhekuni jauaka. ¡I publikasioni uandasïndi néna ísï úni!

Ini foietu jimbo, 12 jorhenguarhikuechaksï jarhasti ka 12 kualidadiicheeri ambe uandasïndi engajtsïni jarhuataaka xénchaani kʼuiripuechani ka paraksï niárani Jesúsiiri chúxapatiini. Mándani jorhenguarhikua Bibliarhu pʼitakata jarhasti ka uandasïndi na enga Jesúsi o máteru kristianu enga primeru siglurhu irekapka niárapka xarhatani kualidadi ma enga aianhpini jámani japka. Iásï, nóteruchi uékasïngia memoria jimbo arhiani kʼuiripuechani ambe engachi uéjka aianguani, sino jirinhakuntani néna xarhatakuani uékperakua. Nájkirukaksï iámindu i kualidadiicha uétarhijka parachi sési aianhpini, jarhastiksï máru engajtsïni kánikua jarhuataaka jiáni engachi ueenaaka uandontskuarheni kʼuiripuecha jingoni, engachi niuaka pʼorhembiantani o engachi jorhendaani jauaka Biblieri ambe.

Engajtsï exeni jauaka jorhenguarhikua ma, eratsenta je nénajtsï úpirini xarhataani indeni kualidadiichani parajtsï úni aianguani kʼuiripuechani engaksï jimeesïsï irekaka engajtsï chá irekaka. Na engajtsï xáni xénchajka Tata Diosï Jeobani ka kʼuiripuechani sánderu jukaparhakuesti eska ambe engajtsï úrajka ka na engajtsï jorhentpijka. Ísï jimbo, kánikua jánguarhinta je sánderu xénchani Tata Diosï Jeobani ka kʼuiripuechani. Engajtsï ísï úska, jarhuataatiksïni parajtsï úni jarhuatani kʼuiripuni paraka Jesúsiiri chúxapatiuaka.

Kʼéri kóntperata máesti chánksïni jingoni marhuakuni Tata Diosïni (Sof. 3:9). ¡Eskaksïni Tata Diosï Jeoba kánikua újchakuraaka jimbokajtsï seguiriixaka kánikua jánguarhintani jarhuataani kʼuiripuechani paraksï Jesúsiiri chúxapatiini ka ísïjtsï xarhatasïnga eskajtsï xénchaasïnga!