Hali Ab’oruganda na Banyaanya itwe abagonzebwa:

Okugonza okutwiniire Ruhanga n’abantu kutwekambisa ‘kugenda kufoora abantu ab’omu mahanga goona abegeswa, nitubabatiza.’ (Mat. 28:​19, 20, NWT; Mar. 12:​28-31) Okugonza okw’okwefeereza nikwija kutukonyera kuhika ha mitima yaabo abaine “entekereza enungi ey’esobora kubaleetera kutunga obwomeezi obutahwaho.”—Eng. 13:​48, NWT.

Kara, twateekaga muno mutima ha kukwata enyanjura n’okuha abantu ebitabu. Kasumi kanu nitwetaaga kusemezaamu omulingo tubazaamu n’abantu. Nitugonza kubooleka okugonza kuraba omu kubazaaho ebintu ebirukubakwataho. Kinu nikimanyisa ngu tusemeriire kwikara twetekaniize kuhinduramu nitusigikirra ha byetaago bya buli muntu. Burocuwa enu niija kutukonyera eta?

Erumu amasomo 12 agarukwoleka emiringo eitusemeriire kukurakuraniza kusobora kwoleka okugonza n’okufoora abantu abegeswa. Buli isomo nirisigikirra ha nkarra ezirukwoleka omulingo Yesu rundi Abakristaayo abaakara baayolekere gumu ha miringo enu omu buheereza. Ekigendererwa kyaitu tikiri ekyokukwata enyanjura omu mutwe baitu kuserra emiringo turayolekamu abantu okugonza. N’obukiraaba ngu nitwetaaga kwoleka emiringo enu yoona omu buheereza bwaitu, nitwija kurora omulingo emu haliyo eri nkuru muno obuturukuba nitutandika kubaza n’abantu, kugarukira abatutebiize, rundi obuturukuba nitwegesa abeegi.

Obworaaba nosoma buli isomo, tekerezaaho omulingo orasobora kwoleka buli mulingo obworaaba notebeza abantu. Weyongere kugonza Yahwe n’abantu. Okugonza oku nikukira obukodyo bwona obw’osobora kukozesa. Nikwija kukukonyera kuhika ha kigendererwa kyawe eky’okufoora abantu abegeswa.

Nikitusemeza muno kukorra hamu naiwe. (Zef. 3:9) Leka Yahwe akuhe emigisa obu nogumizaamu kwoleka abantu okugonza n’okubafoora abegeswa!