Hẽẽre wùr maa de dage wo no:

Dage maaga naa da Baa lan da jar jor wer naa maaga naa mo see see “wer jarn ɓuy, kol ra [ . . . ] go jar maa wer Yeso, joŋ [ . . . ] batem go ne hara” (Mat. 28:​19, 20; Mark 12:​28-31). Hayga naa yaŋ de dage sen ɓil no, naa joŋ de kããge maa kay “jar maaga ɗiggi ɓaara de woore maa da’ tenen maa tum” no—Joŋ. 13:48.

Nen kiŋgi maa blam wo le go mono, naa hay de kaŋ ɗiggi debaŋ diŋ ti siigi wããre maaga naa a le go de ɗeŋ sii wããren ti lan ti ɓrewge kefder ne jare. Patala, naa da ga naa ya’ ɗeŋ ndalge naa de jar wo ciŋ ni de woore. Werga naa da jare, naa da ga naa mo wãã diŋ ti fẽẽre maaga á da wo wããge ti ɓaara. Naa de hay coo wããre naan diŋ see jar maaga naa yiŋ de ɓaara boŋ boŋ ɓuy. Naa mo ɗig go ti re maa see ɓaaran boŋ boŋ ɓuy de woore, lan ti fẽẽre maaga á da wo wããge ti ɓaara mono. Kefder sen mokay la kay naa yaŋ maa joŋge doo sen ne no. Á kay naa na kayge là?

Hadge ɓil kefder sen la 12. Á had wo naa de joŋre maaga naa mo hay de ɓaara ɓili, ga kay wo naa maa ɓo’ nen ne jar ga naa da ra, lan maa kol rage go jar maa wer Yeso. Hadge maa hõnla ɓuy wãã ti mbaa maa ɓil Bible. Á wãã ti joŋre maaga Yeso, noga jee sii wããre maa ɓaa po joŋ joŋre de ɓe ti siigi wããre ɓe. Naa kiɗ diŋ ɗeŋ maa wããge ne jar ga naa da ra, bay diŋ ga naa mo ɗaw ɗeŋ ndalgen wo go ti wa. Joŋre maa hõnla ɓuy de el maa sii wããre, amaa ɓil kefder sen la naa caa ɓil ɓaara go swa’a. Maa taŋgun wo diŋ joŋre maaga naa desãy ɓaara ti maa tĩĩ wer ndalge de jare, maa de ɓogn kay wo naa ti ferge wo da’ jare, maa de swa’n kay wo naa maa had Bible ne jare.

De maaga ndo jaŋ hadge maa hõnla ɓuy ɓil kefder sen la mono, ɗig go de woore ti ɗeŋ maaga ndo joŋ joŋre de joŋre maa ɓil hadge sen ti siigi wããre ti ngeel maaga ndo ni mono. Dur maa ya’ wer dage ɓo see Jeofa, lan see jar ciŋ ni. Dage sen de daŋ ɗeŋ siigi wããren wo ɓuy tu seŋ. Á kay ndo yaŋ maa kol jar go jar maa wer Yeso.

Á co jag wùr debaŋ maaga naa de joŋ joŋre do kããra mono (Sof. 3:9). Daga Jeofa mo kaŋ bosa’ mo ti, de maaga ndo de ya’ wer da jare, de kol rage go jar maa wer Yeso mono!