Ŵakutemweka Ŵabali na Ŵadumbu:

Kutemwa Chiuta kweniso ŵanthu kukutichiska kuti ‘tilutenge kukazgora ŵanthu ŵa mitundu yose kuŵa ŵasambiri na kuŵabatiza.’ (Mat. 28:19, 20; Mrk. 12:28-31) Chitemwa chanadi ntchankhongono. Para tili na chitemwa ichi, tingawovwira awo ŵali na “maghanoghano ghakwenelera umoyo wamuyirayira.”—Mil. 13:48.

Kumanyuma uku, tagwiliskiranga waka ntchito masachizgo gha umo tingapharazgira na kugaŵira magazini. Kweni sono tikukhumba tiwone ivyo tingachita kuti tidumbiskanenge makora na ŵanthu. Tikukhumba kulongora kuti tikutemwa ŵanthu mwakudumbiskana nawo nkhani izo iwo ŵanganweka nazo. Fundo iyi yikung’anamura kuti tiŵenge ŵakunozgeka kusintha upharazgi withu na kudumbiskana na ŵanthu nkhani izo ŵakufipa nazo mtima kweniso izo ŵanganweka nazo. Kasi burosha ili litovwirenge wuli kuchita nthena?

Burosha ili lili na masambiro 12. Sambiro lililose likulongosora mukhaliro uwo tikwenera kuŵa nawo kuti tilongorenge chitemwa apo tikuzgora ŵanthu kuŵa ŵasambiri. Kweniso likulongosora nkhani ya mu Baibolo ya umo Yesu panji muteŵeti munyake mu nyengo ya Ŵakhristu ŵakwambilira wakalongolera mukhaliro unyake mu uteŵeti. Chilato chithu ntchakuti tisungilirenge waka pamtima masachizgo gha umo tingapharazgira yayi, kweni tisange nthowa izo tingalongolera chitemwa ku ŵanthu. Mukhaliro uliwose ngwakukhumbikwa mu uteŵeti, kweni mu burosha ili tiwonenge kuzirwa kwa mikhaliro yinyake pakwambiska chidumbirano, kuchita maulendo ghakuwelerako, kweniso kuchitiska masambiro gha Baibolo.

Apo mukusambira sambiro lililose, ghanaghanirani umo mungalongolera mukhaliro uwo para mukudumbiskana na ŵanthu mu chigaŵa chinu. Ŵikanipo mtima kuti mutemwenge chomene Yehova na ŵanthu. Pa mikhaliro yose, chitemwa ndicho chimovwiraninge chomene kuti mufiske chilato chinu cha kuzgora ŵanthu kuŵa ŵasambiri.

Tikuwonga chomene mwaŵi uwo tili nawo wakuteŵetera namwe na mtima umoza. (Zef. 3:9) Mphanyi Yehova wamutumbikani chomene apo mukulutilira kutemwa ŵanthu na kuŵazgora kuŵa ŵasambiri!