Talofa Taina mo Tuagane:

Te alofa ki te Atua mo tino e fakamalosi ei tatou ke “olo . . . ki fenua katoa o fai a tino i ei mo fai a soko, kae papatiso atu latou.” (Mata. 28:​19, 20; Male. 12:​28-31) Te alofa sē fakapito tenei e malosi ‵ki. E mafai o oko tonu atu ki loto o tino kolā “e ‵tau o maua ne latou a te ola se-gata-mai.”—Galu. 13:48.

I aso ko ‵teka, ne ‵saga atu tatou ki te taulotoga o pati e ‵tau o fai atu mo te tufatufaatuga o ‵tou tusi. Kae nei la, ko manakogina ke ga‵lue tatou ke mumea aka te ‵lei o ‵tou atamai i te faiga o sautalaga. E ma‵nako tatou o fakaasi atu te alofa ki nisi tino mai i te sau‵tala ki mataupu kolā e fiafia latou ki ei. Ko tena uiga e ‵tau o faigofie ke fulifuli tatou kae ke fakafetaui faka‵lei ki mea kolā e mafaufau kae fiafia ki ei te tino. E fesoasoani mai pefea te polosiua tenei ke fai ne tatou te mea tena?

E 12 mataupu i te polosiua tenei kolā e akoako mai ei a uiga e manakogina ke ati aka ne tatou ke mafai o fakaasi atu te alofa kae fai a soko. A mataupu takitasi konei e fakavae ki tala mai i te Tusi Tapu, kae fakaasi mai ei se uiga telā ne fakaasi atu ne Iesu io me se tino talai i te senitenali muamua i te galuega talai. Te fakamoemoega ke se tauloto fua a pati e ‵tau o fai atu, kae ke ‵sala atu foki ki auala ke fakaasi atu te ‵tou alofa ki tino. E tiga eiloa e aoga a uiga takitasi konei ki vaega katoa o te ‵tou galuega talai, ka onoono nei tatou me e aoga pefea a nisi uiga konei māfai ko kamata se sautalaga, te faiga o toe asiga io me fai a akoga faka-te-Tusi Tapu.

I te taimi e onoono koe ki mataupu takitasi, mafaufau faka‵lei me ka fakaasi atu pefea a te uiga tena mafai ko faipati koe ki tino i tau koga talai. Taumafai ke fakamalosi aka tou alofa ki a Ieova kae penā foki ki tino. Te alofa tena telā e sili atu i so se auala ka fesoasoani atu ki a koe ke fakataunu tou fakamoemoega ke fai a soko.

E loto fakafetai eiloa matou ki te tauliaga tāua tenei ke ga‵lue fakatasi mo koe. (Sefa. 3:9) Ke fakamanuia atu a Ieova i te taimi e tumau ei koe i te fakaasi atu o te alofa ki tino kae fai a soko!