Эргим ха-дуңма!

«Бүгү чоннарны сугже суп, оларны Мээң өөреникчилерим боор кылдыр ээлдириңер» дээн Иисустуң даалгазын күүседиринче Бурганга болгаш кижилерге ынакшыл бисти оттуруп турар (Мф. 28:19, 20; Мк. 12:28—31). Хууда ажык бодавас ынакшыл дыка улуг күштүг болур. Ол ынакшыл мөңге чуртталгага чедирер алыс шынны хүлээп алырынга сундулуг улустуң чүрээнге дээштиг боор (Аж.-ч. 13:48).

Мооң мурнунда бистиң сорулгавыс чугаа эгелээр сөстерни өөренип алгаш, улуска библейжи дептерни арттырары турган. Ам болза бис улус-биле чугаалажыр арга-мергежилди сайзырадырын кызып турар бис. Кижилерге ынакшылды илередип, оларның сонуургалдарының дугайында чугаалажыры чугула. Ону кылыр дизе, эскериичел бооп, улусту чүү дүвүредип база оларның чүү бодап турарын билип алыр болза эки. Ындыг арга-мергежилди сайзырадырынга биске бо дептер дузалаар.

Бо брошюрада 12 кичээл бар. Ында 12 шынарның дугайында бижээн. Ол шынарлар кижилерге ынакшылды илередиринге база өөреникчилер белеткээринге дузалаар. Кичээл бүрүзү библейжи үзүндүге даянган. Ында Иисустуң азы бирги векте кандыг-бир суртаалчының бир-ле онзагай шынарны канчаар илередип турганын көргүскен. Бистиң сорулгавыс — чугаа эгелээр сөстерни доктаадып алыры эвес, а кижилерге ынакшылды илередир аргаларны дилээри-дир. Шупту шынарларны бараалгалывыска илередири чугула-даа болза, шынар бүрүзү чугааны эгелээринге, дараазында улаштырарынга база библейжи кичээл эрттиреринге канчаар дузалаарын сайгарар бис.

Шынар бүрүзүн сайгарып тургаш, ону чериңерде чурттап турар улус-биле чугаалажырда канчаар илередип болурун боданыңар. Иеговага болгаш кижилерге ынакшылыңар сайзырадыңар. Силерге өөреникчилер белеткээринге чугаалажыр кандыг-бир арга-даа эвес, а чүгле ынакшыл дузалаар.

Силерниң-биле чаңгыс эптиг бараалгаары биске улуг хүндүткел-дир (Соф. 3:9). Улаштыр-ла ынакшылды көргүзүп, улусту өөредирин соксатпаңар! Иегова силерниң күжениишкиннериңерни элбээ-биле йөрээр кылдыр мөргүп тур бис!