Kermanotak:

Te skʼuxul koʼtantik ta stojol te Dios sok ta stojol te ants winiketik ya stij koʼtantik ta schʼuunel te mantalil ini: «Baanik, otsesaik ta jnopojel te ants winiketik ta spisil nacionetik. Akʼtiklanbeyaik yichʼik jaʼ» (Mat. 28:​19, 20; Mar. 12:​28-31). Bayal yuʼel ya x-aʼtej te smelelil kʼuxul oʼtanil. Ya xjuʼ ya xkʼot kʼalalto ta skʼubulil yoʼtanik te ants winiketik te «jich yoʼtanik te ya xkuxinik ta sbajtelkʼinal» (Hech. 13:48).

Ta nailto tal la jpastik tulan yuʼun ya xjil ta joltik te bin-utʼil ya xkʼopojotik sok te ants winiketik sok te ya kijkitaytik publicacionetik. Pero, ta ora ini jaʼ ya jkʼantik te yakuk jnaʼtik ta lek bin-utʼil ya xkʼopojotik sok te ants winiketik. Ya kakʼbeytik yil skʼuxul koʼtantik ta stojolik kʼalal jaʼ ya kalbeytik skʼoplal te bin ya smulanike. Te bitʼil yanyantik-a te bin ya smulanik sok ya smel yoʼtanik yuʼune, jaʼ ya skʼan ya kalbeytik skʼoplal kʼalal ya xkʼopojotik sok te ants winiketike. ¡Jaʼ ya snojptesotik ta spasel te folleto ini!

Te folleto yichʼoj 12 leccionetik te ya scholbey skʼoplal 12 ta chajp taleliletik te jpisiltik ya skʼan ayuk kuʼuntik swenta ya kakʼtik ta ilel kʼuxul oʼtanil sok ya kotsestik jnopojeletik. Te jujun lección ya scholbey skʼoplal jun talelil te la yakʼ ta ilel te Jesús o jtul jchʼuunjel ta sbabial siglo kʼalal la scholik te skʼop Diose. Te bin ya jkʼantike jaʼ te ya jletik bin-utʼil ya kakʼtik ta ilel skʼuxul koʼtantik ta stojol te ants winiketik, ma jaʼukix te ya kalulantik te bin kʼayemotik ta yalele. Te taleliletik ya yalbey skʼoplal te folleto spisil-ora ya xtuun kuʼuntik, pero kʼaxtoxan-a te kʼalal ya jcholtik te skʼop Dios, ya jchaʼulaʼtaytik te ants winiketik sok ya kakʼbeytik nojptesel yuʼun Biblia.

Te kʼalal ya anop te jujun lección, nopa awaʼiy te bin-utʼil ya awakʼ ta ilel te jujun talelil te kʼalal ya acholbey skʼop Dios te ants winiketik te banti kuxinemate. Manchukme ya jnaʼtik ta lek scholel skʼop Dios, te bin mukʼxan skʼoplale jaʼ te skʼuxul koʼtantik ta stojol te Jehová sok ta stojol te ants winiketik. Jaʼ yuʼun pasa tulan yuʼun ya amukʼubtesxan te skʼuxul awoʼtan, jaʼme ya skoltayat ta yotsesel jnopojeletik.

Bayal ya yakʼ stseʼelil koʼtantik te jun-nax ya x-aʼtejotik sok te jaʼexe (Sof. 3:9). ¡Akʼa yakʼbeyex bendición te Jehová te bitʼil ya apasik tulan ta yakʼel ta ilel kʼuxul oʼtanil te kʼalal ya awotsesik jnopojeletik!