A Vamanji wa Soliwi:

Ocisola tu kuetele Suku kuenda omanu, ci tu vetiya oku ‘enda oku ka longisa omanu vo kolofeka viosi oco va linge olondonge . . . loku va papatisa.’ (Mat. 28:19, 20; Mar. 12:28-31) Ocisola cocili ci kuete unene. Ci pondola oku vetiya ovitima via “vakuotima wa sungulukila omuenyo ko pui.”—Ovil. 13:48.

Kosimbu tua siatele oku tiamisila utima koku patekela ovindekaise viombangulo loku sia alivulu komanu. Pole, cilo tu sukila oku mioñolola uloño wetu woku sapela lomanu. Tu yongola oku lekisa ocisola komanu vakuavo, poku va sapuila catiamẽla kolosapi vi va vetiya. Eci ci lomboloka oku kala vakuesunguluko, oku likolisilako oku kapako asakalalo kuenda ovina omunu lomunu a sole. Ombrochura yilo yi ka tu kuatisa ndati oku ci linga?

Ombrochura yi kuete 12 kovipama vi lekisa ovituwa tu sukila oku kuata, oco tu lekise ocisola kuenda oku linga olondonge. Ocipama locipama ca kunamẽla kulandu umue Wembimbiliya muna Yesu ale ukundi ukuavo wo kocita catete, a lekisa ocituwa cimue kupange woku kunda. Ocimãho cetu haku patekelako ovindekaise viombangulo, pole, coku sanda olonjila vioku lekisa ocisola cetu komanu. Ndaño ocituwa locituwa ci sukiliwa kolonepa viosi viupange wetu woku kunda, tu ka konomuisa ndomo ovituwa vimue vi sukiliwa calua poku fetika ombangulo yimue, poku linga apasu, ale poku endisa alilongiso Embimbiliya.

Poku konomuisa ocipama locipama, sokolola lutate ndomo o lekisa ocituwa cimue, eci o sapela lomanu vo posongo o kasi. Likolisilako oku pamisa ocisola o kuetele Yehova kuenda omanu. Omo okuti ocisola caco ca velapo uloño umue, ci ka ku kuatisa oku tẽlisa ocimãho cove coku linga olondonge.

Tu sanjukila calua esumũlũho linene tu kuete lioku vumba kumue lene lutima umuamue. (Sof. 3:9) Yehova a ku sumũlũise calua, osimbu wamamako oku sola omanu, loku linga olondonge!