Alˈˈo Ishanttoonne Michchenttoo:

Xoossaanne asaa siiqiyogee, nuuni ‘biidi asa ubbaa Yesuusa kaalliyageeta oottidi, eta xammaqanaadan’ denttettees. (Maa. 28:19, 20; Mar. 12:28-31) Nu goˈˈaa aggi bayidi siiqiyo siiqoy keehi wolqqaama. Hegaa mala siiqoy, “merinaa de7uwaassi” suure wozanaa koshshay deˈiyogeeti tumaa siyanaadan maaddana danddayees.—Oos. 13:48.

Nuuni kase, haasayissiyo qofaaninne xuufeta immiyogaa xallan xeelaa wottoos. Shin haˈˈi, nuuni asaa haasayissiyogan kaseegaappe qara gidana koshshees. Nuuni harata ufayssiyabaa yootiyogan eta siiqiyogaa bessanawu koyoos. Hegaa giyogee nuuni haasayissiyo qofaa hanotaadan laammiyageeta, qassi ubba asaa qofissiyabaanne ufayssiyabaa akeekiyageeta gidana koshshees giyogaa. Ha brooshuree nuuni hegaadan oottanawu waati maaddanee?

Ha brooshuriyan 12 timirtteti deˈoosona; he timirtteti nuuni siiquwa bessanawunne erissiyo ashkkara oottanawu nuussi deˈana koshshiya eeshshata qonccissoosona. Ubba timirtteti, Yesuusi woy koyro xeetu layttan wonggeliya mishiraachchuwa yootida harati haggaazuwan bessido eeshshaa qonccissiya Geeshsha Maxaafaa taarikiya yootoosona. Ha brooshuree giigido halchchoy haasayissiyo qofaa hassayanaadan gidennan, nuuni asaa siiqiyogaa bessana danddayiyo ogiya qoppanaadan maaddanaassa. Nuuni haggaaziyo wode ubba eeshshatikka koshshiyaba gidikkonne, haasayissiyogaa doommiyo wode, zaaretti oychchiyo wode, woy Geeshsha Maxaafaa xannaˈissiyo wode issi issi eeshshati keehi koshshiyoy aybissakko akeekana.

Ubba timirttetakka pilggiyo wode, hegan odettida eeshshaa ne heeran deˈiya asaa haasayissiyo wode waata bessana danddayiyakko loytta qoppa. Yihoowanne asaa keehi siiqanawu loytta baaxeta. He siiqoy ay hiillaa goˈettiyogaappekka aaruwan, neeni asaa erissiyo ashkkara oottanawu halchchidobaa polanaadan maaddana danddayees.

Nuuni inttenaara issippe oottiyo gita maataa keehi nashshoos. (Sof. 3:9) Intte ubbatoo asaa siiqiyonne erissiyo ashkkara oottiyo wode, Yihooway inttena loyttidi anjjanaadan amottoos!