Te Tohi Mai Te Kolesi Pule
Naʼi Tehina Mo Tuagaʼane:
Ko te faʼahi ʼae ʼe ina uga tatou ke tou ‘olo ʼo fai ni tisipulo ʼi te hahaʼi ʼo te ʼu fenua fuli pe, ʼo tou papitemaʼi natou’ ʼe ko totatou ʼofa. ʼEi, ʼe tou ʼofa ki te ʼAtua pea mo totatou tatau. (Mat. 28:19, 20; Mko. 12:28-31) ʼE malohi ʼaupito te ʼofa ʼae ʼe tou fakaha. ʼE malave anai ki te loto ʼo natou ʼae ʼe “lelei ʼonatou loto ke natou maʼu te maʼuli heʼe gata.”—Gaue 13:48.
ʼI muʼa atu, neʼe tou faiga ke tou ako fakaʼatamai te ʼu ʼuluaki palalau ke tou fai pea mo tuku he ʼu tohi. Kae ʼi te temi nei, ʼe tou faiga tafito ke tou faipalalau mo te hahaʼi. Ka tou palalau age ki he manatu ʼe natou fia logo ki ai, ʼe ko tou fakaha ai totatou ʼofa ia natou. Koia, ʼe tonu ke tou mulimuli ki te ʼu meʼa ʼae ʼe ʼaoga ki te tagata takitahi. Pea ʼe tokoni atu anai te kaupepa ʼaeni kia koe.
ʼE fakaha ʼi te ʼu ako takitahi ʼe 12 ʼo te kaupepa ʼaeni he kalitate ʼe tokagaʼi ai e te hahaʼi ʼe tou ʼoʼofa ia natou, pea ʼe tou loto ke natou toe liliu mo natou ko he ʼu tisipulo ʼa Sesu. ʼE fakatafito te ʼu ako takitahi ki he vaega Fakatohi-tapu. ʼE ha ai neʼe fakaha e Sesu peʼe ko he tahi ʼo te ʼuluaki sekulo ia te kalitate ʼaia. Ko te fakatuʼutuʼu ʼe mole ko te ako fakaʼatamai he ʼu ʼuluaki palalau kae ke ke mahino pe ʼe feafeaʼi hau fakaha tou ʼofa ki tou tatau. ʼE ke tokagaʼi ai anai ia te ʼaoga ʼo te ʼu kalitate ʼaia ʼe 12 ki te gaue faifakamafola. Kae ʼe ke toe tokagaʼi anai ʼe ʼaoga tafito anai ʼihi kalitate moʼo kamata he faipalalau, mo he ʼaʼahi peʼe ko te fai ʼo he ako Tohi-Tapu.
Ka ke vakaʼi he ako, fakakaukauʼi pe ʼe tonu ke ha feafeaʼi ʼi ʼau palalau te kalitate ʼaia moka ke palalau ki te hahaʼi. Faiga tuʼumaʼu ke ke fakatuputupu muʼa tou ʼofa kia Sehova mo te hahaʼi ʼae ʼi ʼou tafaʼaki. ʼE maʼuhiga he ʼe kotea pe te faiva ʼe ke maʼu kae ko te ʼofa ʼae ka tokoni atu ke ke fakahoko tau fakatuʼutuʼu ʼaeni ʼe ko te fai ʼo ni tisipulo.
ʼE matou fiafia ʼi te tauhi fakatahi mo koe kia Sehova. (Sofo. 3:9) ʼE matou faikole kia Sehova ke ina haga tapuakiʼi tou ʼofa tuʼumaʼu ki te hahaʼi pea mo ʼau faiga ʼae ke ke fai ni tisipulo.
ʼOu tehina,
Kolesi Pule ʼa Te Kau Fakamoʼoni ʼa Sehova