Ŵakunonyelwa Abale ni Alongo:

Kumnonyela Mlungu soni ŵandu kukusatutendekasya kuti ‘tujawule tukajiganye ŵandu ŵamitundu josope kuti aŵe ŵakulijiganya ŵa [Yesu] soni kwabatisya.’ (Mat. 28:​19, 20; Mko. 12:​28-31) Myoyo tukusosekwa twanonyeleje ŵandu yisyesyene. Kutenda yeleyi kuchakamuchisya ŵandu “ŵakwete nganisyo syambone syakwakamuchisya kupata umi wangamala.”—Mase. 13:48.

Munyumamu, nganisyo syetu syaŵaga kwinjisya mumtima ngani syampaka tukamulichisye masengo patukulalichila soni kwalechela ŵandu mabuku gakuti aŵalanjeje. Nambo sambano tukusosekwa tujongolele yatukusatenda patukutanda kuŵecheta ni ŵandu. Yatukusaka yili yakuti ŵandu ayiwoneje kuti tukusitwanonyela mnope. Mpaka tutende yeleyi mwakuŵecheta ngani syakusasinonyela jemanjajo. Myoyo tuŵeje ŵakoseka kuchenga soni tuganichisyeje mnope yindu yakusasaka ŵandu ŵatukuŵechetana nawo nambosoni mwakupikanila jemanjajo. Ana kabukuka chikatukamuchisye chamtuli kuti yeleyi yikomboleche?

Kabukuka kakwete majiganyo 12. Majiganyoga gakusala ndamo syatukusosekwa kukola kuti tukombole kwalosya ŵandu chinonyelo soni kwakamuchisya kuti aŵe ŵakulijiganya ŵa Yesu. Lijiganyo lililyose likusala yaŵatesile Yesu kapena jumo mwa Aklistu ŵa m’yaka 100 yandanda pakulosya ndamo jinejakwe pandaŵi jaŵalalichilaga. Chakulinga chetu nganichiŵa kwinjisya mumtima ngani syakuti tukasikamulichisyeje masengo patukulalichila, nambo chili kupata matala gakulosya kuti tukusitwanonyela ŵandu. Ndamo jilijose jachalijiganye m’kabukuka jili jakusosekwa mnope pa utumiki wetu. Myoyo chitukambilane yampaka tutende kuti tukombole kulosya ndamo syelesi patukutanda kuŵechetana ni mundu, patukutenda maulendo gakuwilisya, nambosoni patukutendesya majiganyo ga Baibulo.

Pakulijiganya lijiganyo lililyose, aganichisyeje mnope yampaka atende kuti akombole kulosya ndamo jakulijiganyajo pandaŵi jakuŵechetana ni ŵandu ŵamudela jawo. Alosyeje kuti akusamnonyela mnope Yehofa soni ŵandu. Chinonyelo jili ndamo jakusosekwa mnope jampaka jakamuchisye wawojo kuti akomboleje kwajiganya ŵandu kuti aŵe ŵakulijiganya ŵa Yesu.

Tukusayamichila mnope upile watukwete wakamula masengo mwakamulana ni jemanja. (Sef. 3:9 NWT.) Tukumŵenda Yehofa kuti ŵakamuchisyeje jemanja pamkupitilisya kwanonyela ŵandu soni kwajiganya kuti aŵe ŵakulijiganya ŵa Yesu.