Sukuʼuneʼex yéetel kiikeʼex:

Le yaabilaj k-uʼuyik yoʼolal Jéeoba bey xan yoʼolal le máakoʼoboʼ le péeksikoʼon utiaʼal k-tsʼoʼokbesik le baʼax tu yaʼalaj Jesúsaʼ: «Xeeneʼex tu yiknal u kajnáaliloʼob tuláakal le kaajoʼoboʼ ka a kaʼanseʼexoʼob utiaʼal ka taalakoʼob tin paach. Tsʼáaʼex u yokjaʼob» (Mat. 28:19, 20; Mar. 12:28-31). Wa k-eʼesik yaabilajeʼ yaan u páajtal k-áantik «le máaxoʼob jach tu jaajil u yóol ku yeʼeskoʼob u kʼáat u kʼamoʼob le kuxtal minaʼan u xuuloʼ» (Hech. 13:48).

Kaʼacheʼ maases k-ilik k-kanik de memoriail bix ken k-tsikbal yéetel k-pʼatik publicaciónoʼob tiʼ le máakoʼoboʼ. Chéen baʼaleʼ beoraaʼ baʼax maas kʼaʼabéeteʼ k-maas maʼalobkíintik bix k-tsikbal. Jach kʼaʼabéet k-tsikbal yéetel le máakoʼob tiʼ le baʼax taak u yuʼubikoʼoboʼ tumen beyoʼ k-eʼesiktiʼob k-yaabiltmoʼob. Utiaʼal leloʼ kʼaʼabéet k-chʼaʼik en cuenta baʼax preocuparkoʼob wa baʼax uts tu tʼaanoʼob, tsʼoʼoleʼ k-tʼaan tiʼ leloʼ. ¿Bix ken u yáantiloʼon le folleto utiaʼal k-lograrkoʼ?

Le publicaciónaʼ ku taasik 12 xookoʼob. Cada junpʼéeleʼ ku tʼaan tiʼ junpʼéel jatsʼuts modos jach jeʼel u yáantkoʼon utiaʼal k-eʼesik yaabilaj tiʼ le máakoʼoboʼ yéetel utiaʼal k-beetik discípuloʼob. Le jatsʼuts modosoʼobaʼ letiʼe tu yeʼesaj Jesús bey xan uláakʼ cristianoʼob teʼ yáax siglooʼ. Beoraaʼ k-metaeʼ letiʼe k-ilik bix jeʼel u páajtal k-eʼesik yaabilaj tiʼ le máakoʼoboʼ, maʼ k-kanik de memoriail bix ken k-tsikbal tu yéeteloʼobiʼ. U jaajileʼ tuláakal le jatsʼuts modosoʼob ku xakʼaltaʼal teʼ folletoaʼ jach kʼaʼanaʼanoʼob utiaʼal k-kʼaʼaytaj, chéen baʼaleʼ jujunpʼéel tiʼ letiʼobeʼ maas jach kʼaʼabéetoʼob utiaʼal k-káajsik k-tsikbal, utiaʼal k-beetik revisita wa utiaʼal k-tsʼáaik xook.

Le kéen a xakʼalt cada junpʼéel xookeʼ tukult bix jeʼel u páajtal a weʼesik le jatsʼuts modos kéen tsikbalnakech yéetel le máakoʼob teʼ tuʼux kajaʼanechoʼ. U jaajileʼ jach importante le jejeláas bix jeʼel u páajtal u kaʼansaj máakoʼ, chéen baʼaleʼ maas importante u yeʼesaʼal yaabilaj. Le oʼolaleʼ ilawil ka maas nojochchajak a yaabilaj yoʼolal Jéeoba bey xan yoʼolal le máakoʼoboʼ, leloʼ le kun áantkech a beet discípuloʼob.

Sukuʼuneʼex yéetel kiikeʼex jach kiʼimak k-óol k-múul meyaj ta wéeteleʼex (Sof. 3:9). Jéeoba ka u bendecirteʼex utiaʼal ka seguernak a weʼeskeʼex yaabilaj yéetel utiaʼal ka a beeteʼex discípuloʼob.