A NIN SRAN BO YALƐ KOKOLƐ BO
LIKE SUANLƐ 2
Amun koko yalɛ kɛ sran kun nin i janvuɛ sa
Ndɛ cinnjin’n: “Ndɛ ng’ɔ ju i kanlɛ sɛsɛsɛ mɔ be kan’n, i kpa liɛ’n be kanman.”—Ɲan. 15:23.
Like nga Filipu yoli’n
1. Nian VIDEO’N, annzɛ kanngan Sa Nga Be Yoli’n 8:30, 31 nun. I sin’n, bu kosan nga’m be akunndan:
?Ngue yɛ like nga Filipu yoli’n kle e-ɔ?
2. Sɛ e nin sran’n e koko yalɛ kɛ e si e wun sa’n, i sɔ’n kwla yo maan sran’n wun i wun fɛ. Ɔ maan ɔ kwla kplin su kɛ e nin i koko yalɛ e wɔ e ɲrun.
Sɔnnzɔn Filipu
3. Fa ɔ ɲin sie like su. Wafa nga sran kun yo i ɲrun’n nin wafa ng’ɔ siesie i sa mun’n be kwla uka e naan y’a wun ninnge sunman be wlɛ. ?Sran’n kunndɛ kɛ ɔ nin wɔ bé íjɔ? Sɛ a kunndɛ kɛ á kán Biblu’n nun ndɛ klé i’n a kwla usɛ i kɛ: “?A si kɛ …?” Sɛ sran’n kunndɛman kɛ ɔ nin wɔ bé íjɔ’n nán miɛnmiɛn i.
4. Tra ɔ awlɛn. Nán se kɛ kɛ amun bo yalɛ kokolɛ bo cɛ’n á bó jasin fɛ’n klé i. Minndɛ blɛ ng’ɔ ti su’n naan w’a bo jasin’n w’a kle i. Ɔ kwla yo blɛ mɔ amún wá kókó yalɛ cɛn uflɛ’n.
5. Fa ɔ ɲin sie i ndɛ ng’ɔ lo i’n su. Atrɛkpa’n kɛ amún kókó yalɛ’n sran’n kwla bo ndɛ uflɛ su. I lɛ nun’n fɛ i ɲin sie i Biblu’n nun ndɛ kun m’ɔ kwla ukɛ i’n su. Kannzɛ bɔbɔ i klikli nun’n nán ndɛ sɔ’n yɛ a sunnzunnin kɛ á kán’n sanngɛ kan.
