IFYO MWINGATENDEKA UKULANSHANYA
ISAMBILILO 2
Mulelanda Kwati Mulelanshanya Fye
Ishinte lye funde: “Kabili amashiwi ayalandwa apo pene fye yalefwaikwa—yalawama sana!”—Amapi. 15:23.
Ifyo Filipi Acitile
1. Tambeni VIDIO, nelyo belengeni Imilimo 8:30, 31. Lyena lanshanyeni amepusho yakonkapo:
Finshi Tulesambilila Kuli Filipi?
2. Nga tuletendeka ukulanda na bantu kwati tulelanshanya fye, tabakaleumfwa umwenso, kabili bakalaitemenwa ukumfwa ku fyo tulefwaya ukubeba.
Mulepashanya Filipi
3. Mulebikako Amano. Ifyo umuntu alemoneka pa menso ne fyo alecita kuti fyalenga mwaishiba ifyo aletontonkanya. Bushe uyo muntu alemoneka ukuti alefwaya ukulanda na imwe? Kuti mwalanshanya nankwe ifya mu Baibo nga mwalanda fye ukuti, “Bushe mwalishiba ukuti . . . ?” Mwilapatikisha abantu ukulanda na imwe nga tabalefwaya.
4. Muletekanya. Mwilamona kwati mulingile ukulanda pa fya mu Baibo apo pene fye. Mulelolela inshita yalinga pa kuti mutendeke ukulanshanya no muntu. Inshita shimo, te kuti mulanshanye no muntu ifya mu Baibo apo pene fye, kuti mwaisalandapo inshita imbi.
5. Mulealula ifya kulanda. Nalimo umuntu kuti atendeka ukulanda pa fintu ifyo mushacilaenekela. Kanshi muleitemenwa ukulanshanya na bantu ifingabafwa nangu ca kuti nalimo nafipusana ne fyo mwe bene mwacilafwaya ukulandapo.
