စးထီၣ်တဲသကိးတၢ်ဒီးပှၤဂၤ
တၢ်မၤလိ ၂
တဲတၢ်ဒီးပှၤဂၤသ့သ့ဘၣ်ဘၣ်
တၢ်ဂ့ၢ်လၢအရ့ဒိၣ် “တၢ်ကတိၤလၢ ပှၤတဲဝဲလၢ တၢ်ဆၢကတီၢ်လၢ အကြၢးအဘၣ်န့ၣ် မုာ်ဝဲဒိၣ်မးလီၤ.”—ကတိၤ ၁၅:၂၃.
စီၤဖံလံးပူး မၤဝဲဒ်လဲၣ်
၁. ကွၢ် တၢ်ဂီၤမူ ဒီး ဖး မၤတၢ် ၈:၃၀, ၃၁. ဝံၤဒီးတဲသကိး တၢ်သံကွၢ်လၢလာ်တဖၣ်အံၤ–
ပမၤလိန့ၢ်တၢ်လၢ စီၤဖံလံးပူး အအိၣ်ဒ်လဲၣ်
၂. ပမ့ၢ်စးထီၣ်တဲတၢ်ဒီးပှၤဂၤသ့သ့ဘၣ်ဘၣ်န့ၣ် အဝဲသ့ၣ် ကအဲၣ်ဒိးက့ၤတဲတၢ်ဒီးပှၤ ဒီးကဘၣ်သးဒိကနၣ်ဝဲ တၢ်ဂ့ၢ်လၢပကတဲ.
ကွၢ်လိမၤဒိး စီၤဖံလံးပူး
၃. ပာ်သူၣ်ပာ်သး တၢ်အိၣ်လၢနခိၣ်နဃၢၤ. ပမ့ၢ်ကွၢ် ပှၤတဂၤ အတၢ်ပာ်သူၣ်ပာ်သး, အတၢ်ပာ်မဲာ်ပာ်နါ ဒီးအတၢ်အိၣ်ထီၣ်အိၣ်လီၤန့ၣ် ပကသ့ၣ်ညါထီၣ် အဂ့ၢ်တစဲး. အဃိ ပကြၢးသံကွၢ်လီၤပသးလၢ မ့ၢ်ပှၤတဂၤအံၤ အဲၣ်ဒိးတဲတၢ်ဒီးပှၤစ့ၢ်ကီးဧါ. ဒ်သိး ပကတဲပၠးအီၤ ကစၢ်ယွၤ ကလုၢ်ကထါအဂီၢ် ပမ့ၢ်စးထီၣ်တဲအီၤလၢ “မ့ၢ်နသ့ၣ်ညါ . . . ဧါ.” မ့ၢ်ဖျါလၢ ပှၤတဂၤအံၤ မ့ၢ်တအဲၣ်ဒိး တဲတၢ်ဒီးပှၤဘၣ်န့ၣ် တဘၣ်မၢန့ၢ်ဆူၣ်အီၤလၢ အကတဲတၢ်ဒီးပှၤတဂ့ၤ.
၄. အိၣ်ဒီးတၢ်ဝံသးစူၤ. ဖဲနထံၣ် ပှၤတဂၤဂ့ၤတဂၤဂ့ၤအခါ တဘၣ်ဆိမိၣ်လၢ နကဘၣ်တဲအီၤလၢ ကစၢ်ယွၤ အကလုၢ်ကထါတဘျီဃီတဂ့ၤ. နကအဲၣ်ဒိး တဲပၠးအဝဲသ့ၣ်လၢ ကစၢ်ယွၤကလုၢ်ကထါ ဘၣ်ဆၣ် တဘျီတခီၣ် တၢ်ခွဲးတၢ်ယာ်တအိၣ်ထီၣ်ဘၣ်. အဃိ နမ့ၢ်အိၣ်ဒီးတၢ်ဝံသးစူၤန့ၣ် လၢခံတဘျီ နမ့ၢ်ထံၣ်အီၤန့ၣ် နတၢ်ခွဲးတၢ်ယာ်အိၣ်ထီၣ်ဝဲသ့.
၅. ဆီတလဲသးဒ်တၢ်အိၣ်သးအိၣ်ဝဲအသိး. တဘျီတခီၣ် ဖဲနတဲတၢ်ဒီးပှၤဂၤအခါ အဝဲသ့ၣ် ကတဲတၢ်ဂ့ၢ်လၢ နတဆိမိၣ်ပာ်စၢၤအီၤဘၣ်. အဃိ ဆိကမိၣ်ထီၣ် ဒီးတဲပၠးအီၤတၢ်ဂ့ၢ်တခါခါလၢ အဘၣ်ထွဲလိာ်သးဒီး တၢ်ဂ့ၢ်လၢအတဲဝဲ.
