KUPUTUKA KUSHIMUTWILA NAVATU
CHILONGESA 2
Kuhanjika Mwahanjikila Mutu
Lundongi: “Mazu akuhanjika halwola lwakutamo anapu amwaza.”—Vishi. 15:23.
Vyuma Alingile Fwilipu
1. Talenu VINDIYO, chipwe tangenu Vilinga 8:30, 31. Kufumaho lihulisenu vihula vino vinakavangizaho:
Vyuma Muka Tunalinangula Kuli Fwilipu?
2. Kachi nge natuhanjika mutwahanjikila, kaha natukafwa mutu tuli nakushimutwila nenyi aunde muchima nakwivwilila kuvyuma natuhanjika.
Londezezenunga Fwilipu
3. Pwenu vakuvanguluka. Munahase kutachikiza omwo apwa mutu, hakukekesa solokeso yenyi, nomwo ali nakusoloka hameso nomwo ali nakuzachishilamo mujimba. Kutala mutu kana nasoloka nge nakusaka kushimutwila nayenu tahi? Munahase kuputuka kushimutwila nenyi muchano wamuMbimbiliya hakumuhulisa ngwenu, “Kutala watachikiza ngwove . . . ?” Kamwatela kushinjila mutu uze keshi nakusaka mushimutwile nenyiko.
4. Pwenu namuchima wakutalilila chikoki. Kanda kushinganyeka ngwenu kuvanga kaha muputuke kushimutwila namutu muchano wamuMbimbiliya hahaze veneko. Undenu muchima mangana mumwambulile halwola lwakutamo. Lwola lumwe chasakiwa kukashimutwila nenyi likumbi lyeka numba mukahase kumwambulila.
5. Zachisenu jijila jakulisezaseza. Lwola lumwe mutu muli nakushimutwila nenyi nahase kuhanjika chihande cheka. Shikaho shimutwilenu nenyi vyuma vize navimukafwa numba tuhu mwaliwahisanga chihande cheka.
