UPACERIHA UWOOPANA MWAHA ATTHU
MWAHA 2
Wuuluma toko cinoolumakeehu
Ikano: “Nuulumo nomaana nowuulumiya ukati woophwanelana ninaareera venci!”—Miru. 15:23.
Isiyani Filipe yaapankilyaawe?
1. Moone IVIDIYU awula nsome Miteko 8:30, 31. Mwamalihaka, mwaakhule ala makohwaala:
Ntakihero na Filipe ninniitthuciha isiyani?
2. Namuulumanaka ntthu wuulalyaani khampa cinoolumakeehu khula nihuku, ninaamwiiriha ntthuuyo ukhala ootaphuwa ni uncivela uviriyana ihapari cinlalyeereehu.
Muntakihe Filipe
3. Nkhale oowehaweha. Ikhovyaawe ntthuuyo ni moolumacerwaawe pooti wuukaviherani uncuwela ntthuuyo. Mwanwehakavale, munnomoona wiira uyo naapheela uwuulumanani? Wiira mwancere umuulumana mwaha wo mbiiblyani, nyuuva pooti unkoha co: “Mwaanaacuwela wiira . . . ?” Nhinkhanyererihe ntthu aahitthuneke uwuulumanani.
4. Nkhale oovilela. Nhuupuwele wiira nhaana mmoopanaka myaha co mbiiblyani ntthuuyo wowaakuvyaaca. Pooti wuuluma citthu cikhwaawe nwehereraka uphiya ukati womaana wiira muulume mwaha wo mbiiblyani umpheeleenyu unlalyeera. Iyo maanaaya wiira cihaavo ikwaha cinhaleenyu umuulumana paahi ntthuuyo woohoopela mwaha Ibiiblya mpaka nihuku nikhwaawe nnohaleenyu umoonanana-tho.
5. Ntthune urukunusa mwahooyo. Pooti ukhalaka wiira ntthuuyo naapacera wuuluma citthu cikiina cahaapheeleenyu umuulumana. Ntthune urukunusela mwahooyo yooyo mphanttyooyo wiira muulume itthu inoonaawe ukhala yofayita, hataa ukhalaka wiira khunakhala mwaha waatthenkacileenyu wiira muulume.