OPACERYIHA OVAANELA
YOOHUSERYA 2
Mmukhalelo Wooyariwano
Nlakiheryo: “Nave ti waphaama masu ene elociwe mu elukuluku yoophwanelela!”—Mas. 15:23, TNM.
Tiheeni Filipi Opankeiye?
1. Moone EXILEMA, naari mwaalakhanye Saweeriwa ti Arummwa 8:30, 31. Voocharela, mwaakhule makoho anacharela:
Tiheeni Nnahuseryaahu Orweela wa Filipi?
2. Wakhala wi ninneeriha wi ovaanela wahu ovuweke mmukhalelo wooyariwano, ti yawooneya wi muchu onahaala okhala ootaphuwa ni ooreheryeya owiriyana michaka sahu.
Mmutakiherye Filipi
3. Mukhaleke oovareryela. Mikhalelo sa ethoi ya muchu ni masu onaphariheleiye vaavaa onaloceiye, inanwerya oloca sincipale vooloca sa muchu yoowo. Apwanne muchu owo ori ooreheryeya oloca ni nyuwaano? Wakhala wi tooreheryeya, munanwerya opacerya oloca vooloca sa Piipiliya mookhweya mmukohaka muriki: “Apwanne mwaanasuwela wii . . . ?” Nyenya, mwiiwexexa wi muchu owo haanono nchuno na oloca, muhimukhinyeererye ovaanela.
4. Mukhaleke oopisa murima. Muhuupuwele wi munaphwanela opaceryiha mwawaakuveya ovaanela vooloca sa Piipiliya. Nweherye elukuluku yaphaama wi muloce michaka saphaama sa Mpiipiliyani mmukhalelo woooyariwano. Akhweya eyo enanwerya otaphulela oweherya ophiyerya vaavaa munahaalaanyu ovaanela ni muchu yoowo wanaawiili.
5. Mukhaleke ooreheryeya. Vakina vaya, muchu onanwerya opacerya oloca sa ichu seiyo mwahaawehereryaanyu. Mukhaleke ooreheryeya ovaanela ni muchu sa mwaha yoowo owo onooneiye okhala woochuneyaxa, naamwi yooniheryaka wi muloce sa eparipari ya Mpiipiliya yoohiyana ni yeeyo mwaareherenryaanyu.
