KUYAMBISHA MAKAMBILANO
MUTU 2
Mukochita vinthu mwachibadwa
Mfundo yofunika kuiganizila: “Mawu olaŵiliwa pa nthawe iweme—ni aweme!”—Miy. 15:23.
Vechichita Filipo
1. Lolelani VIDIYO, kapena ŵelengani Machitidwe 8:30, 31. Pavuli pake ganizilani makonsho aŵa:
Kansi tuphunzila chinji kuli Filipo?
2. Tikayambisha makambilano mwachibadwa n’vosakayikisha kuti munthu wamene uyo angamasuke ndipo tingakambilane naye uthenga wasu.
Konkhejani Filipo
3. Mukofufuza. Mawonekedwe a chinso cha munthu komasoti muŵili wake vingatiyavye kuziŵa vinthu vinyinji vokhuza munthu wamene uyo. Kansi munthu wamene uyo owoneka kuti ofuna kulaŵila namwe? Mungayambe kukambilana na munthu choonadi cha m’Baibolo pomukonsha kuti, “Kansi muziŵa kuti . . . ?” Osati mukokakamija munthu wamene ofunalini kulaŵila.
4. Mukonkhala oleza ntima. Osati mukokulumija kuyamba kulaŵila naye choonadi cha m’Baibolo mwazizizi. Lindilani mpata uweme ndipo pavuli pake yambani kukambilana naye mwachibadwa. Vamene ivi vutanthauza kuti mufunika kulindila mpaka muzakambilane nayesoti munthu wamene uyo.
5. Mukonkhala wololela. Munthu wamene uyo angalaŵile vinthu vakuti mwenze viyembekezelalini. Tetyo mukonkhala wokonzeka kukambilana naye mokatijana na mwavilili vinthu kuli munthu wamene uyo, olo kuti vamene ivi vingachitishe kuti osati mukambilane mfundo ya m’Baibolo yemwenze mwakonzekela.
